Oleh: Wisran Hadi | 22 September 2008

DIKARAJOAN URANG

Takajuik si Atang mancaliak panampilan si Jila. Lah barubah bana kawan tu kini. Talingo, iduang, bibie lah baagiah subang. Di lihie tagantuang pulo dukuah tangkurak kapalo urang sagadang tinju. Langannyo dilingka galang aka baha. Pakai tatoo pulo di dakek katiak. Jari tangannyo panuah dek cincin; batu akiak, tapak jalak, dalimo, kacubuang jo badar basi. Di pinggang tasalek pulo karih ketek.

“Baru saminggu den tingga an, lah barubah se waang mah. Baa mangko co iko bana ko? Frustrasi bana waang dek karano indak tapiliah jadi kapalo daerah? Stres?” tanyo si Atang ka si Jila.

“Ruponyo waden dikarajoan urang. Patuiklah indak surang juo nan mamiliah den. Nyo kabuakan pandangan urang mancaliak den. Sahinggo tak nampak waden dek urang banyak lai doh. Iyo jahek permainan urang tu. Dukun kiramaik dari ma kolah nan dibaonyo salamo kampanye kapatang,” jawek si Jila sakik hati.

“Sia nan mangarajoan?”

“Indak paralulah itu nan disabuik. Badoso awak manuduah-nuduah urang. Nan jaleh kini waden lah dapek panangkanyo, nyo agiah Angku Kiramaik Panjang Jangguik.”

“Jadi, baa mangko sagalo nan aneh-aneh ko waang pakai. Subang, galang, kaluang, karih? Bantuak hantu sasek nampak diden mah.”

“Kecek Angku Kiramaik tu, waden akan diserang dari segala jurusan setiap detik oleh berbagai jenis hantu setan tu supayo waden mati capek. Hantu setan jihin tu akan masuak ka badan den ko dari sagalo tampek nan lamah. Dari lubang talingo, lubang iduang, muncuang, lihie, pasandian, pusek. Itu mangko Angku Kiramaik maagiah den sagalo tangka setan tu. Itu nan den pakai kini,” jawek si Jila.

“O, jadi jo sagalo subang, cincin, kaluang jo galang untuk paambek setan masuak ka badan waang?”

“Iyo. Waang nyinyie komah.”

“Jaan jaan nan setan tu waang,” baleh si Atang galak surang.

“Sudahlah Tang. Waang pandai mancimeeh den se. Angku Kiramaik tu iyo bana kiramaik. Cubo pikie dek waang. Urang nan sadang luko parah, nyo latakkan sajo salai daun tantang luko tu, baranti luko tu sakali. Baa? Hebat inyo ndak?”

“Kok barubek pulo waden ka Angku Kiramaik tu baa Jila?”

Apo sakik waang?”

“Waden sakaum lah kalaparan. Kecek urang, kamanakan, anak dunsanak-dunsanak den tu dapek busung lapar. Aden ka mintak tangka lapa ka dukun kiramaik tu.”

“Mukasuik waang?”

“Den ka mintak daun tangka lapa. Kutiko den latakkan daun tu di pusek den ko, ilang lapa den agak satahun. Indak paralu waden makan-makan lai. Baa gak hati waang Jila? Lai buliah ndak?”

“Jihin! Itu cimeeh tumah! Ma lo ado daun nan bisa manahan lapa urang salamo satahun! Gilo waang!”

“Buliah nak samo-samo gilo bana awak, Jila. Kini indak waang sajo nan lah gilo dek dukun-dukun tudoh, tapi hampie sadonyo urang Minang nan mangaku baugamo Islam ko lah gilo badukun. Labiah picayo inyo ka dukun kiramaik dari pado kekuasaan Tuhan lai. Labiah kuaso pulo dukun pado Tuhan dek mereka tu lai. Lah banyak nan syirik.”

“Sudahlah Tang. Aden dikarajoan urang, kanai sihir. Itu sababnyo aden mintak tolong ka Angku Kiramaik,” jawek si Jila sakik hati.

“Kok lai ka mintak toloang juo, manga indak langsuang se ka Tuhan. Baa kok pakai perantara pulo? Awak ko kan urang Islam. Diaja untuk mandoa, mamintak langsuang kapado Allah. Waang kiro Tuhan tu paralu lo pakai agen? Itulah waang. Salamoko karajo waang jadi agen tiket, jadi agen rakyat, agen iko agen itu supayo dapek komisi. Lalu waang sangko Tuhan baitu pulo. Punyo agen. Handie!”

“Tu kini baa nan rancak lai?”

“Campak an sagalo tangka-tangka nan waang pakai tu. Pai mandi, manjuak aie, sumbayang, mintak tobat, mangaji, badoa, mintak bana langsuang ka Tuhan apo nan waang inginkan. Jaan awak ko samakin gaek jadi samakin bodoh, Jila.”

“Jadi, nan salamo ko waden lah sasek?”

“Indak sasek lai doh, mandan. Lah jadi syirik! Kok mati waang dalam kaadaan syirik ko, waang langsuang diumbanan masuak narako! Narako Jahanam! Narako wel! Mintak tobat capek! Sumbayang!”

“Lai ka Makkah juo urang madok sumbayang lai, Tang?” tanyo si Jila kacamehan.

“Indak!” jawek si Atang.

“Ha? Jadi kama madok urang sumbayang kini lai Tang?” rarau si Jila.

“Ka Kiblat molah, bengak!” hariak si Atang.

*


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: