Oleh: Wisran Hadi | 22 September 2008

PASAR BEBAS, SAKOTANG

Si Jila lah patah samangat. Inyo tamanuang di pangka jambatan kanso. Lalu si Atang nan baru pulang dari kanduri manujuah hari urang kampuangnyo nan mati di elo ombak kutiko gampo bacampua jo pasang naiak. Si Jila maajak si Atang mangecek di bawah batang dadok.

“Waden kecewa,” kato si Jila maelo angok. Inyo nampak sadiah bana.

“Ha? Dek sari waang basumangaik bana jadi Satpol PP, maurus pasa. To kini lah baranti se? Indak sasuai gaji jo tanago nan dikaluakan?” tanyo Atang.

Ado hal-hal nan mambuek aden kecewa jo urang banyak ko,” sambuang si Jila.

Apo tu? Jalehan lah ka den.”

“Kutiko waden jadi Satpol PP. Basobok den jo urang gaek manggaleh durian. Inyo manyasak bana sampai ka jalan. Den kecekan, pak kalau manggaleh awak musti tertib, ikuik aturan. Jaan menggaleh nan salamak dek apa se. Lai tahu waang baa jawek apa tu?”

Apo jaweknyo?”

“Berang nyo ka den. E, anak mudo, keceknyo ka den. Lai mambaco koran kalian ndak? Indak? Lai tahu kalian, bahaso kini awak lah masuak ka dalam Pasar Bebas. Lai tahu ndak apo arti pasar Bebas? Indak tahu? Pasar bebas tu artinyo, urang manggaleh ko bebas apo nan dijuanyo, siapo nan mambalinyo, bara haragonyo, di ma inyo manggaleh. Itu nan pasar bebas. Baa kalian ko. Awak petugas pasa, tapi arti pasar bebas se indak tahu.”

“Jadi pasar bebas tu mukasuiknyo bebas sagalonyo. Oto bebas parkir, oplet bebas lalu lalang manurunan panumpang, urang bagak bebas mamintak pitih ka supir-supir. Urang buliah bebas manjual apo nan ado dinyo. Manjua diri buliah juo. Baitu?” tanyo Atang.

“Ma jaleh diden. Apak tukang durian tu tanyato labiah hebat pulo lai daripado ahli ekonomi tantang pasar bebas.” Jawek si Jila.

“Iyo dareh apak tumah. Dari ma inyo mambao durian?”

“Keceknyo dari Koto Tangah. Kami ko urang Sakotang, tahu kalian ndak, kecek apak tu ka den sambia manapuak dado. Sakotang tu artinyo Sakoto Tangah! Saluruah urang Koto Tangah! Kok waang usie den manggaleh di siko, sa Koto Tangah urang ka mambunuah waang. Bengak! Baa mangko samakin bengak se petugas-petugas pasa ko kini, ha?. Baitu kecek apak tu,” kecek si Jila katakutan.

“O, jadi Sakotang tu Sakoto Tangah. Den kiro waang salah sabuik, sakoteng waang sabuik sakotang. Sakoteng kan minuman dari santan bacampua jahe, kacang, roti tigo karek. Sagaleh saribu. Indak itu doh?” kato si Atang galak takangkang.

“Kecek apak tu pulo, kalau den usie inyo manggaleh di pasa ko, bararti samo jo mausie sagalo urang Koto Tangah nan ado di nagari ko. Waang tahu ndak, Walikota tu sakotang tumah, hariak apak tu ka den. Baa manuruik pandapek waang Tang. Waden taruih se diancam dek urang-urang macam apak tu. Itu sababnyo waden baranti jadi Satpol PP. Pado tarancam nyawa den di tangah pasa, yo ndak?”

“Jadi apo nan ka waang karajoan lai?”

“Weaden ka baraja agamo elok-elok di surau Batu, sudah tu baraja adat jo Datuak Tan Tapo.”

“Lai dapek pitih awak dek baraja agama jo adat tu?”

“Urusan waang cuma pitih, pitih, pitih. Kalau nak jadi urang, isi dado waang jo keimanan, isi utak waang tu jo pengetahuan adat budaya. Itulah akibatnyo, kalau sakola dulu karajo mancenek se. Tatap bano sampai gaek,” kato si Jila berang.

“Sudah lah Jila. Jaan dihino bana kawan waang ko lai, “jawek si Atang baibo hati.

*


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: