Oleh: Wisran Hadi | 24 September 2008

DOTOR ANDUS

Mamak si Jila, Daraman namonyo, lah pulang dari Australia. Sabaleh taun inyo di sinan. Kini lah manatap di kampuang. Dek inyo urang dari rantau, inyo disuruah mambuek KTP. Pailah Daraman ka kantua Desa.

Sampai di kantua, inyo disuruah duduk dek jurutulih. Duduak ma adok ka jurutulih. Jurutulih madok ka masin tik. Sambia mantik jurutulih batanyo ka Daraman. Bak rupo polisi mananyo urang tatangkok maliang ayam.

“Apak ka mambuek KTP?”

“Iyo.”

“Namo?”

“Darman.”

“Daraman. Gala?”

“Sutan Mudo.”

“Sagaek ko apak bagala sutan mudo?”

“Iyo itu gala nan diagiah mamak ambo dulu.”

“Gala sarjana bagai lai ado?”

“Lai.”

“A tu?”

“Dotor.”

“Dotor? Apak dotor? Bantuak apak se sarupo urang maidok sakik tujuah taun! Kuruih. Kapalo colak sunguik bauban. Bajalan se tadi den caliak indak tagok lai doh. Tagak apak se alah oyoang. Kalau indak den suruah duduak tadi, mungkin alah tatilantang apak di lantai kantua den ko. Jaan bagarah juo apak jo den.”

“Ambo serius. Ambo iyo dotor.”

“Dotor ko banyak macamnyo pak. Dotor badah, dotor panyakik dalam, dotor saraf, dotor tulang, dotor baranak. Apak dotor apo?”

“Dotor bahaso.”

“Dotor bahaso? E yayai! Maa adoh dotor bahaso. Kecek apak bahaso ko adoh pulo nan sakik?”

“Iyo. Ambo dotor bahaso.”

“Pak, ko den serius mangecek ka apak. Dotor bahaso tu namonyo dotorandus. Kalau nan padusi namonyo dotoranda. Tamat IKIP. Baa apak ko? Paniang?”

“Iyo bana. Ambo dotor. Sambilan tahun ambo jadi dosen di Australi. Gala dotor ambo ko indak babali bagai doh. Sah. Ado ijazahnyo.”

“Jaan batangka disiko, malu awak. Pak, kini den kecek an ka apak. Gala apak sabananyo dotorandus. Jaan dikicuah pulo den lai.”

Darman maangguak-angguak surang. Jurutulih tu taruih mantik. Drs. Daraman Sutan Mudo, nan sabananyo DR. Darman St. Mudo.


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: