Oleh: Wisran Hadi | 26 September 2008

DIKAJA EFBIAI

Si Sabai tu anak urang Agam sabaleh lareh, dalam nagari Padang Tarok. Namo langkoknyo Sabai Nan Aluih. Kalau nak basuo jo inyo, baco buku kaba SABAI NAN ALUIH. Inyo pernah main dalam pilem, jadi gadih rancak. Kalau main dalam randai inyo jadi gadih anak urang kayo tapi panangih. Si Sabai tu punyo surang adiak bujang matah, banamo Mangkutak Alam. Dari sabanyak tu urang padusi di Minangkabau, dari dulu sampai kini, Sabai suranglah baru nan barani manembak urang untuk membalehan kamatian bapaknyo. Mati urang tu dek inyo. Aratinyo bana, si Sabai tu pandai manembak. Si Sabai pandai manembak sadang tagak, nan adiaknyo labiah hebat pulo lai, pandai manembak ateh kudo. Pokoknyo kaduonyo katurunan tukang tembak sajak dulu.

Kutiko Amerika tabaka ikue dek karano gedung WTC jo Pentagon nyo lanyau dek kapatabang, saminggu sasudah tu tadanga kaba bahaso Amerika ka mancari sia sajo nan punyo pangalaman dalam bunuah-mambunuah, nan punyo sinapang, akan ditangkok, diadili, dipinjaro, kalau paralu dihukum mati. Sabab, pastilah tukang-tukang tembak nan ado ko punyo hubungan jo teroris. Kaba tu mungkin didanga si Sabai dari radio lutuik, antah kok dari tipi tipuan, antahlah.  Tapi sajak mandanga kaba tu, si Sabai paniang. Angek-angek pangka katiaknyo.

Inyo paniang dek takuik kanai tuduah. Sabab, dari sabanyak ko urang padusi, inyolah nan punyo badie. Inyolah nan pandai manembak. Tantu inyo bisa dianggap punyo hubungan pulo jo teroris. Sabab kalau indak punyo hubungan, dari ma pulo si Sabai baraja manembak? Inyo se alun panah pai ka Afganistan latihan manembak lai doh. Ka Libia apo lai. Baraja manembak di ateh kudo, jatuah pulo.

“Manyasa den tembak Rajo Nan Panjang  tu, Kutak. Rancak den racun sajo inyo lai. Indak ka terlibat bana den saroman kini ko,” kecek si Sabai ka adiaknyo.

“Sajak sari den kecek an. Jaan pandareh bana. Alun manga-manga lai doh urang lah kakak tembak. Manembak urang lah gaek tantu indak ka sasarik bana tu doh,” jawek si Mangkutak mengaritik kakaknyo.

“Apo kecek waang! Manembak urang gaek? Pado aden ditembaknyo dulu, ma nan elok?”

“Iyo. Rajo Nan Panjang tu kan lah gaek. Sapangkek babe awah mah. Kini baa lai. Sabanta lai tantu tibo efbiai mancari kakak. Di ma kakak ka manyuruak an badan nan sagapuak tu ha?”

“Kok sagapuak ko bana badan kakak waang ko, tolong juolah suruak an badan den ko. Kok iyo inyo tuduah beko aden dek efbiai tu. Nyo bao den ka Nuyok, baa aka waang. Sia nan ka mananak an nasi waang? Nan ka mambasuah baju waang sia?” isak si Sabai.

“E, kak. Kok makan nan ka akak sabuik, kini banyak restoran siang malam. Kok baju nan kadibasuah akak sabuik, masin cuci saunggauk urang jua tangah pasa. Dek sari iyo, padusi ko paralu. Apo lai padusi Minang. Tapi kini?”

“Tapi kini baa? Banyak muncuang waang!” ariak si Sabai.

“Sajak kakak manembak Rajo nan Panjang, kan indak surang juo laki-laki nan barani mandakek i  kakak lai doh. Itu sababnyo kakak indak dapek laki sampai kini. Urang takuik, kok mambao badie pulo kakak sampai ka tampek tidua.”

“Kambiang waang Kutak! Soal waden indak balaki, jaan waang sangkuik pauik an pulo jo tatembaknyo Rajo Nan Panjang. Itu untuang nasib den. Kini taruih tarang se lah. Lai namuah waang manyuruak an den dari efbiai tu ndak? Lai indak ka baa dek waang aden ko nyo tangkok? Ha? Lai indak kabaa nagari ko kanai jajah sakali lai? ” (WH)

*


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: