Oleh: Wisran Hadi | 26 September 2008

FATSAL-FATSAL URANG TAK BARADAT (01)

1.      Awak se nan malaguan lagu Barat, urang barat tu sendiri indak panah malaguan lagu awak doh. Apo mukasuik. Nak jadi agen kaset lagu-lagu barat?

2.      Lah jaleh jalan sampik, oto baparkir indak karuan. Lah taniayo urang nan takaja pulang. Nak mampalagak an bahaso awak indak tahu jo aturan?

3.      Lah jaleh dalam baralek tu banyak urang gaek, pangulu, ustad, ulama, mintuo, ipa bisan. Samo-samo saliang sagan manyagani. Kutiko saroman tu artis-artis mingguan nan tambangannyo dari baralek ka baralek malagu bagoyang-bagoyang,  mamakai baju jo sarawa tak karuan. Tampak pulo tatonyo di pusek.

4.      Undangan baralek lah datang pukua sapuluah. Pukua sapuluah tu pulo urang katering baru datang. Padohal lah dibaia sabalunnyo. Apo mukasuik? Minta tambah baie? Atau indak maharagoi tamu nan datang?

5.      Kutiko makan baralek, nyo ambiak nasi jo samba banyak-banyak. Lah panuah piriang nasi nyo tu bantuak piriang patambuhan, tapi indak nyo abihan. Mubazir. Akok namonyo dulu.

6.      Anak gadih pai baralek jo mandenyo. Pakai sarawa sampik, baju sampik, indak basalendang, samantaro mandenyo pakai kain saruang, basalendang duo, bajilbab pulo lai.

7.      Lah jaleh urang baralek di tampek nan ketek, sampik, tu babunian pulo orgen tunggal sakareh-karehnyo sarupo urang main band di tangah lapang. Apo mukasuik? Supayo urang nan pai baralek tu capek pakak talingonyo? Nak mampakayo dotor talingo awak?

8.      Undangan baralek lah banyak nan tibo. Kutiko sadang banyak tu pulo urang tukang mic mamasang-masang kabel, mantes-tes mic. Lah pakak talingo urang sabalik. Nak mampacaliakan awak nan paliang sibuk?

9.      Lah jaleh urang pai baralek pakai sipatu kasadonyo. Tu, anak tari galombang nan rancak-rancak tu mananti tamu tak batarompa sorang alah juo. Nak mintak dibalian sipatu ka urang nan datang? Mariangik namonyo dulu tumah.

10.  Amplop ciek nyo, tipih pulo tu amplopnyo. Tapi nan datang sagondoang pai baralek. Apo mukasuik? Nak makan perai tangah hari?


Responses

  1. mudah-mudahan awak ndak masuak dalam kategori ko…amiiinnn


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: