Oleh: Wisran Hadi | 26 September 2008

PITUAH SIMALANCA (01)

Urang takantuak, latiah atau jago lalok ditandoi dek kuok. Kuok tu suatu pekerjaan nan indak disuruah-suruah. Muncuang mangango, angin lalu dari dalam, urek-urek tagang, sudah kandua.

Kuok indak disumbarang wakatu. Ado wakatu-wakatu nan buliah awak kuok, ado pulo wakatu-wakatu nan indak buliah awak kuok, walau saroman apo juo kantuak awak.

Ikolah pituah Simalanca nan musti tuan-tuan ikuti sabalun kuok;

  1. Dilarang kuok kutiko awak sadang babisiak dakek talingo urang. Talabiah urang tuo atasan awak, mintuo awak, atau pangulu awak. Jaan-jaan nyo sangko beko awak ka makan kapalo inyo dek karano muncuang awak gadang bana mangango.
  2. Dilarang kuok kutiko sadang muncuang barado dakek mikrofon iduik. Beko tadanga dek urang saroman garagasi sadang maineh baun manusia. Nan bedo kok malompek pulo mik tu ka dalam muncuang dek kareh bana maelo angok.
  3. Dilarang kuok kutiko mancaliak buayo sadang malutok bangkai kambiang. Beko nyo sangko dek buayo, awak nan buayo. Nan bedo kalau buayo tu buayo darat pulo.
  4. Dilarang kuok kutiko sadang makan sagun-sagun. Ka babuek Perdanyo lai. Makan sagun-sagun muncuang musti dirapek an. Takacuali makan galamai, atau samba lado bada.
  5. Dilarang kuok katiko sadang manyayang bini (khusus bagi nan alah babini sah!). Jan sampai bini maanggap awak ka manggigik talingonyo. Atau manganggap awak mampacaliak an gigi ameh nan baru bapasang.
  6. Dilarang kuok sasudah makan kalio jariang saembe panuah. Kok salah sangko urang beko, manyangko awak baru kalua dari wese.
  7. Katiko sadang mambaco Pituah Simalanca. Kalau sadang mambaco pituah lalu langsuang kuok, jaan-jaan beko dibao dek urang ka Gaduik, rumah sakik gilo.
  8. Katiko masuak ruang sidang DPR. Jaan-jaan nyo sangko awak manyindia anggota dewan tu beko. Kok takalok bana anggota tu dalam ruang sidang tu padia selah, mungkin inyo pulang pagi dek bagadang malam tadi.
  9. Katiko sadang mancukua jangguik atau mancukua bulu katiak. Jaan-jaan beko tabang bulu-bulu tu ka dalam muncuang. Kasadaan awak beko.
  10. Jaan kuok kutiko awak sadang mambangkik batang tarandam. Muncuang musti dirapek an supayo jan masuak pangka batang tu ka dalam muncuang.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: