Oleh: Wisran Hadi | 26 September 2008

PITUAH SIMALANCA (02)

1.      Kalau awak tingga di kampuang urang, awak musti patuah ka aturan nan dibuek urang nan punyo kampuang. Jaan sampai urang tapaso maubah kebiasaan jo aturannyo hanya dek karano awak surang. Jan pulo dipakai alasan HAM lai. Kok lai baradaik, ikuik aturan urang. Dima bumi dipijak di sinan langik dijunjuang.

2.      Baitu pulo kalau awak tingga di bumi Allah ko. Jaan sampai pulo Tuhan dimintak manuka aturannyo untuak mamanuhi salero buruak awak surang. Aturan Tuhan pulo nan ka di ubah, dareh bana awak tu? Sia awak?

3.      Baitu pulo kalau kuliah di Unand. Jaan sampai pulo Unand nan dipaso maubah aturan nan alah balaku dek karano awak suko barambuik gondrong, batarompa japang, babaju kaus tampak pusek. Kok indak namuah maikuik aturan nan ado, cari sikola nan lain, nan buliah bak kato awak.

4.      Baitu pulo kalau awak lah harus masuak panjaro. Jaan sampai barubah pulo paraturan jo undang-undang dek ulah awak malu masuak pinjaro. Makonyo, sabalun awak kanai hukum, jaan talampau ongeh bana.

5.      Jaan ditanyoan ka urang lapau nasi “lai ado banak” kalau awak taragak makan gulai banak.

6.      Jaan tasingguang kalau awak di ateh angkot surang sajo, si supir maimbau panumpang lain “indak baurang doh uni”.

7.      Jan masuak kadai samo jo bini kalau urang kadai maimbauan “apo cari da, masuaklah da, di dalam lai rancak-rancak da” dilakaknyo awak dek bini tu beko.

8.      Jaan malicinan muko nan sadang bajirawek jo ampaleh basi atau jo garinda.

9.      Jaan maimbau amak “ondeh mak oi” kalau tacaliak pusek padusi nan sadang manggaliek di supermarket.

10.  Jaan pai ka mall kalau hanyo untuak mandinginan badan sasudah bapaneh-paneh di tangah pasa. Listrik AC urang tu kan babaie tu!

11.  Jaan mancukie gigi kalau kalua dari lapau nasi padohal nan dimakan cuma bubua candin.

12.  Jaan talampau acok mancaliak jam tangan kutiko urang sadang mangecek.

13.  Jaan mahariak-hariak pamain bola kalau inyo indak bisa manggoalkan gawang lawan kutiko awak sadang manonton bola di tivi.

14.  Jaan pai pulo bauru-uru ka pinjaro mancaliak kawan, kalau kawan tu ditunda eksekusinyo.

15.  Kalau datang padusi-padusi mambao anak ketek mintak sidakah, jaan diagiah sidakah dulu. Tanyo, anak nan nyo bao tu anak sia? Inyo lai balaki atau indak? Kok lai balaki manga inyo malala mintak sidakah sanjo-sanjo ka rumah urang?

16.  Jaan maasuang-asuang bini pai mintak sidakah mambao anak ketek.

17.  Labiah rancak urang nan manilai bahaso awak iyo mikin. Indak awak pulo doh nan mangaku-ngaku miskin. Beko dituduah awak gakin, berang pulo.

18.  Jan suko mangecek; waden jujur se komah. Samakin awak mangecekan bahaso awak jujur, samakin urang tak picayo.

19.  Jan suko mangecek; indak ado masalah. Samakin acok awak manyabauik – indak ado masalah, urang manjadi tambah bamasalah.

20.  Kalau awak jadi pegawai, jaan suko mangecek; iko pengabdian. Padohal awak dapek gaji tiok bulan. Pangabdian macam apo tu nan dimukasuik?

21.  Kok iyo awak sukses dirantau, bao sukses tu pulang. Jaan urang di kampuang nan dilagak-lagak.

22.  Urang Minang nan suko malagakan pitih, kapandaian, pangkek, ka urang kampuang, tandonyo inyo indak dapek angin di rantau.

23.  Kok iyo ka jadi guru agamo atau ustad nan sabananyo, kain saruang jaan disandang di lihie, tapi pakai. Urang nan suko manyandang kain saruang biasonyo pareman.

24.  Kacomato agiahan ka pejabat nan ulang tahun. Kacomato kudo! Supayo jaan maempa-empa pancaliakannyo ka nan lain.

*


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: