Oleh: Wisran Hadi | 26 September 2008

SI SABAI CETING

Alah sadonyo urang-urang mudo pai ka warnet (warung internet). Nak urang tu ceting, tanyo jawab di internet sacaro lansuang. Ado nan galak-galak surang di muko komputer tu, ado nan marabo-rabo, ado nan marameh-rameh paruik. Sabai Nan Aluih indak pulo namuah katinggalan. Inyo sato pulo ceting.

Baru sajo inyo mangetik, lansuang tadanga dariang di komputer tando urang lain masuak ka “room” si Sabai.

ANTAH SIA   :  Hi!

SABAI :  Dari ma?

ANTAH SIA   :  New Zeland.

SABAI :  Jauah mah. Lai urang awak ko?

ANTAH SIA   :  Tentu dong.

SABAI :  Manga di sinan?

ANTAH SIA   :  Latihan. Tiga bulan lagi selesai. Setelah itu pulang sebentar.

SABAI :  Ondeh da oi. Pulang bana uda, anak juo nan kabatambah nyo da.

ANTAH SIA   :  Hahahahaha.

SABAI :  Baa mangko galak surang uda di sinan. Damam?

ANTAH SIA   :  Kamu lucu deh. Di mana kamu sekarang?

SABAI :  Di dalam baju.

ANTAH SIA   :  Hihihihihi. Sedang belajar ya?

SABAI :  Di muko komputer,da. Ceting.

ANTAH SIA   :  Hehehehehe. Betul juga. Boleh kenalan?

SABAI :  Lai da. Jalan-jalan lah ka rumah.

ANTAH SIA   :  Di mana rumahmu?

SABAI :  Di jalan Sahala.

ANTAH SIA   :  Uh..uh..uh..uh..

(Si Sabai mandanga suaro aneh. Sasudah tu ka lua tulisan

BUZZ! Sabai takajuik)

SABAI :  Manga da? Takantuk?

(Sudah tu kalua pulo gambar muko urang sadang galak gadang)

Gambar apo ko da? Poto uda yo?  To sagadang-gadang tu bana

gigi uda?

ANTAH SIA   :   Kamu benar-benar orang Minang. Pancimeeh!

SABAI :   Iyo da. Minang. Kabaunyo lah tajua da.

ANTAH SIA   :   Boleh uda kirim surat?

SABAI :   Kirim lah da. Panjangan stek da. Buliah takalok awak di tampek

tidua mambaconyo.

ANTAH SIA   :   Okelah. Kalau uda poskan sekarang, bulan depan tentu sudah

sampai.

SABAI :   Indak da. Satahun.

ANTAH SIA   :   Setahun?

SABAI :   Iyo da. Kalau dimasuak an bulan Desember.

ANTAH SIA   :   Hahahahaha..

SABAI :   Uda panggalak bana mah. Lah pakai gigi baru uda yo?

ANTAH SIA   :   Kok tahu?

SABAI :   Manuruik kiro-kiro hati ambo sajo nyo da.

(Sudah tu, kalua gambar hati banyak, turun dari ateh sampai ka

bawah. Sabai takajuik pulo.)

Da! Daun apo nan sabanyak tu jatuah tu da? Lai indak daun

talingo uda nan ruruik ko?

ANTAH SIA   :   Hihihihihi.. kamu benar-benar lucu. Uda suka kamu deh!

SABAI :   Iyadehda. Uda tentara yo?

ANTAH SIA   :   Kok tahu?

SABAI :   Tapi uda latihan. Nan latihan tu kan biasonyo tentara.

ANTAH SIA   :   Iya. Latihan pakai peluru tajam lagi.

SABAI :   Lai pernah uda manembak urang? Lah bara nan mati?

ANTAH SIA   :   Belum.

SABAI :   Awak alah da.

ANTAH SIA   :   Ha? Kamu pernah menembak orang? Pakai apa?  Jo embe

tabuak. Hahahaha!

SABAI :   Pakai sinapang bana, da.

ANTAH SIA   :   Mati orangnya?

SABAI :   Mati.

ANTAH SIA   :   Siapa nama korbannya?

SABAI :   Rajo Nan Panjang.

ANTAH SIA   :   Rajo Nan Panjang dari Payakumbuh?

SABAI :   Iyo da.

ANTAH SIA   :   O, jadi kamu yang bernama Sabai Nan Aluih itu ya! Jahanam

kamu!

SABAI :   Baa mangko baitu bana uda ka awak?

ANTAH SIA   :   Kau tahu siapa yang kau bunuh itu! Itu bapak saya! Hanjiang!

SABAI :   Kan lah iyo tu da. Bapaknyo malamar Sabai, indak berhasil.

Kini dilanjuik an pulo dek anaknyo.  Indak juo jaran-jarannyo

doh. Baa mangko baitu bana da.

(Sasudah tu kalua gambar urang mancibie. Makin lamo makin

banyak, sampai panuah layar monitor tu dek gambar tu.  Si

Sabai sakik ati. Nyo tinggakan komputer tu.)

Sasudah Sabai Nan Aluih mambaie seo komputer, inyo langsuang ka lua. Manyubarang jalan sambie baruto-turo surang.

“Pandai pulo mampacaruik i  den gai! Sadang bapak waang se lai kanai hati ka den, apo lai waang!”(WH)

**


Responses

  1. ndeeeeeeeeeeeee takikiak kikiak wak nyo mbaco carito gaek ko…… sero lo cetingnyo.

  2. Hanjiang! <— takekeh galak wak mambaco ko😀

  3. Aw, this was an exceptionally good post. Taking a few minutes and
    actual effort to generate a great article… but
    what can I say… I put things off a whole lot and don’t manage to get anything done.

  4. Hello there! I could have sworn I’ve visited this blog before but after browsing through a few of the posts I realized it’s
    new to me. Anyways, I’m definitely happy I discovered it and I’ll be book-marking it and checking back often!

  5. My partner and I absolutely love your blog and find the majority of your post’s to be what precisely I’m looking for.
    Do you offer guest writers to write content available for you?
    I wouldn’t mind creating a post or elaborating on a lot of the subjects you write in relation to here. Again, awesome site!


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: