Oleh: Wisran Hadi | 27 September 2008

ESTEOKA

Sajak Mangkutak indak bajabatan lai, dek karano indak masuak dalam daftar esteoka kapatang, mulai taraso panik. Oto diambiak dek kantua, honor-honor nan ditarimo salamo ko, pindah tangan. Sopir lah pindah karajo pulo manyopir nan lain. Anak-anak taruih se tabiaso iduik manjo. Sajak itu, Mangkutak tapaso maukua-ukua kamampuan badan diri. Nak mancari caro lain untuak bisa taruih batandiang malawan dunia urang. Ujuangnyo tatap satu, UUD! Ujung-ujungnya duit. 

Kutiko basobok jo aciaknyo nan banamo Sabai Nan Aluih tu, Mangkutak langsung curhat.

“Ciak. Saroman waden kini ko, manuruik aciak apo lai karajo nan tapek untuak den.”

“O, waang nak mancari karajo nan tapek? E, Mang. Waang tau ndak urang Piaman. Inyo indak paduli jo esteoka-esteoka doh. Esteoka surang selah. Sabab, basisuruik se inyo bajalan dapek juo inyo pitih?” jawek Sabai.

“Urang sadang maelo pukek tantu iyo basisuruik. Jaan aciak ota pulo waden lai,” kato Mangkutak agak tarabo.

“Cubo pulo waang paratian urang Piaman di tangah pasa. Nyo goyang-goyang sajo kakinyo, dapek juo pitih. Esteoka esteoka surang sajolah, nan inyo tatap manggoyang kaki. Iduik juo inyo anak baranak,” kato Sabai.

“Tukang jaik, tantu iyo inyo manggoyang kaki. Baa aciak ko?” kato Mangkutak mandareh.

“Tu? Apo karajo dek  ang lai?”

“Kok dapek, karajo saketek pansiun lambek, gaji badacak bini rancak, rumah jo oto sabanyak anak,  kok awak lalu urang musti tagak!”

“O, bisa. Bisa. Jadi gubenur waang lai namuah?” tanyo Sabai.

“Waden aciak suruah jadi gubenur?  Gilo aciak mah!  Bara urang buliah jadi gubenur tu?  Kan surang nyo. Aciak tea komah.  Kok jadi ketua partai se aden baa?”

“Lai dotor gala waang?”

“Apo pulo tu kaitannyo gala dotor jo partai. Kalau nak kamambuek fakultas iyo paralu gala dotor. Ketua partai itu kan samo sajo jo kapalo pemuda di kampuang den.”

“Kalau indak dotor, lai banyak pitih ang.”

“Waden kamancari pitih, manga pulo pitih den diagiahkan untuk jadi ketua partai.”

“Baa mangko kareh bana ati waang nak jadi ketua partai?”

“Banyak urang nan maagiah pitih, tau aciak ndak!  Labiah-labiah kutiko sadang bak kini. Kutiko urang ka mamiliah calon bupati.  Kanyang! Picayolah aciak,” jawek Mangkutak.

“Waang nak jadi ketua partai apo?”

“Sumbaranglah!  Nan ma partai nan indak ado ketuanyo, bia aden jadi ketua.”

“Lai ka masuak aka tu, waang jadi ketua partai? Ha? Lai logis tu?  Waang se indak panah jadi anggota, tu waang nak jadi ketua. Sia bana waang?”

“Tu? Apo karajo den nan rancak lai?”

“Kok baitu baa.”

“Baa?”

“Ado karajo nan rancak bana untuak urang saroman waang ko.”

“A tu?”

“Maagah-agah pulau. Tagak waang ditapi lauik di balakang Taman Budaya tu ha, galak-galak surang madok ka pulau Pandan.”

“Sia nan kamanggaji den?”

“Tadi waang batanyo apo karajo nan rancak. Lah Ai tunjuak an. Kini waang mintak pulo sia nan kamanggaji. Soal waang bagaji atau indak, itu bukan urusan Ai.. Nan pokok waang adoh karajo. Kan itu nan penting!”

“O, baitu yo! Maagah-agah pulau, yo!  Indak ado nan manggaji den yo! Aciak suruah waden mati tagak den di balakang Taman Budaya tu yo!”

“Kok nak kabagaji juo waang, buek gaji surang. Kok ketek gaji waang, naiak an gaji ang tu dek waang surang. Nak naiak ampek puluah persen, ampek ratuih persen, ampek ribu persen, tasarah dek waang! Kalau indak ado pitih untuak pambaia gaji waang, salang pitih urang!”

“Cikcah!  Aciak lai basuah muko tadi pagi indak?” tanyo Mangkutak sakik hati.

“Baa baitu? Manjuak aie bana Ai pagi pugeh. Sumbayang subuh Ai. Indak basuah muko baa?” tanyo Sabai.

“Den kiro aciak sadang barsian juo baru lai,” jawek Mangkutak sambia turun janjang. (WH)


Responses

  1. lucu bana caritonyo, yo bana totok bahaso minangnyo,ha ha ha ………….


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: