Oleh: Wisran Hadi | 17 November 2008

RATOK TALONSOANG

Ibo ibo se hati si Sabai sajak kapatang. Taragak bana inyo jo bapaknyo. Tapi baalah mangatokannyo, bapak lah di bunuh dek Rajo Nan Panjang. Katiko sadang sabak-sabak tu tibo adiaknyo nan banamo Mangkutak Alam.

“Baa aciak kok rusuah se den caliak. Alun juo tibo surek cinta dari urang tu lai?” kato Mangkutak sambia galak.

“Waang iyo sabana anak jihin agaknyo komah. Ai taragak jo bapak, dikecek an Ai rusuah indak manarimo surek cinta. Kok iyo bana Ai alun balaki, jaan lah baitu bana mancamoohan Ai,” baleh si Sabai berang.

“Kalau ibo-ibo hati tanpa alasan tu, tando lah dakek hari ka puaso mah ciak,” jawek Mangkutak.

“Iyo agaknyo tumah. Dek itu agaknyo baa mangko hati Ai ibo-ibo babarapo hari ko. Kok pai ziarah awak baa nyo, Mang. Sajak bapak dibunuah urang, alun ado awak mancaliak kuburan bapak lai do,” ajak si Sabai.

Mangkutak maangguak-angguak dek binguang. Inyo indak tahu di ma kuburan bapaknyo. “Ciak. Takana diden, awak kan indak panah pai ka kuburan bapak. Kok sasek awak beko ndak?” kato Mangkutak serius.

“Waang taruih se batangguah komah. Barisuak kito pai! Ai bisa tahu kuburan bapak Ai. Ai punyo filing! Bapak Ai, Ailah nan tahu dima kuburannyo. Barisuak kito pai, jaleh! Barisuak!” hariak si Sabai. Mangkutak maangguak maiyokan dek takuik ka kakaknyo nan pandareh tu.

Bisuaknyo, si Sabai jo Mangkutak duo baradiak tu pai baziarah.

Sampai di pandam kuburuan, inyo tacangang. Ado ciek kuburan nan alah dibarasiahan urang. Sia nan mambarasiahan indak jaleh. Tapi si Sabai indak paduli. Tangihnyo lah sampai di rangkuangan. Sambie manyerak-nyerakan bungo tujuah ragam ka ateh kuburan tu, aie matonyo jatuah balinang. Takana bapak nan lah dibunuah urang. Sabai maratok maluluang panjang. Sadangkan si Mangkutak, taruih juo bapikie-pikie, iyo itu kuburan bapaknyo atau indak. Tapi inyo indak barani mangecek ka kakaknyo.

“Ondeh bapak. Maafkan Ai bapak oi. Di siko molah bapak bakubua. Baa kok tukang kaba indak maagiah tahu Ai,” ratok si Sabai baibo hati.

Sadang lamak-lamak maratok, tibo pulo urang padusi surang. Sabai takajuik. Siapo pulo padusi ko? “Manga tante kamari,” kato si Sabai icak-icak ramah.

“Ziarah ka kuburan laki awak,” jawek padusi tu sambie duduak basimpuah tantang mejan kuburan sambie manyerak-nyerakan bungo.

“E, iko kan kuburan bapak Ai? Awak sia?” kato si Sabai berang.

“Iyo, iko kuburan laki awak. Tiok ka puaso awak ziarah kamari,” jawek padusi tu.

“Laki awak tu sia?” tanyo si Sabai tagak pinggang dek sakik hati.

“Rajo Nan Panjang. Inyo mati di bunuah dek Sabai Nan Aluih. Nyo tembak laki den. Nyo tembak, nyo tembak…nyo tembak..tembak..tembak.. tebak..” rarau padusi tu bagolek-golek di ateh kuburan.

Tabik ragu si Sabai. Apo iyo nan nyo ratok i tu kuburan Raja Nan Panjang? “Ikolah karajo tukang kaba! Indak inyo kabakan bagai doh di ma Rajo Nan Panjang bakubua. Indak nyo jalehan pulo dima bapak Ai dikubuakan. Ikolah akibatnyo kalau tukang kaba sato pulo mambohongi publik! Sato-sato latah pulo manyuruakan fakta! Lah kaliru Ai dek tukang kaba tu jadinyo! Tanyato nan Ai ratok i kuburan laki-laki nan alah Ai tembak,” garutok si Sabai sambia mambarasiahkan tanah-tanah nan malakek di kodeknyo.

“Jaan jaan kuburan ko iyo kuburan bapak awak, ciak,” kato Mangkutak sambie manuruni janjang pakuburan tu. “Padusi gapuak saroman lamang Limo Kaum tu mungkin bini simpanan bapak awak,” sambuang Mangkutak.

Batambah-tambah rabo si Sabai. “E, waang Mangkutak! Pandai pulo waang menyangsian kesetiaan bapak awak! Anak apo waang ko!” kato si Sabai.

“Itu tandonyo waden ko anak nan kritis mah ciak,” jawek Mangkutak indak namuah kalah.

“Kritis ka kritis juo kecek waang. Tumah dek kritis waang lah salah Ai maratok i kuburan. Lah talonsong Ai maratok,” garutu si Sabai.

*


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: