Oleh: Wisran Hadi | 17 November 2008

SABAI JADI PEJUANG JENDER

Sajak era reformasi ko, lah sibuk bana Sabai kini. Hampie tiok minggu inyo pai ceramah, rapek, seminar, sakali-sakali sato pulo demonstrasi. Lah paniang pulo urang sakampuang, pai kama si Sabai. Mangkutak, adiaknyo nan suko main alang-alang tu agak ragu lo ka kakaknyo tu. Balaki alun juo sampai kini lai. Kok dikecek an pai pacaran indak pulo. Nyo cari dek Mangkutak sampai ka musajik Jamik, indak pulo ado kakaknyo nan kamek tu di sinan do. Dek lamo lambek dek mancari, kasudahannyo basuo juo Mangkutak jo si Sabai di hotel bintang limo. Ruponyo si Sabai baru abih seminar.

“Ciak. Baa mangko sarik bana aciak pulang. Lah cameh urang sakampuang. Antah kok lah nyo bunuah aciak dek dunsanak Rajo nan Panjang. Mambaleh dandam dek karano aciak manembak Rajo nan Panjang tu sampai mati,” kato Mangkutak.

Si Sabai galak bagumam. Tibo-tibo matonyo merah, nyalang saroman urang berang. “E, Mang,” keceknyo ka Mangkutak. “Ai kini sadang seminar jender, lai tahu ndak! Ai kini sadang mampajuangkan nasib padusi-padusi Minang ko. Jaan sampai salamak paruiknyo sajo laki-laki ka padusi. Caliak nasib Ai! Nyo lamar dek Rajo nan Panjang untuk bininyo nan kasakian. Itu malanggar HAM!” lagak si Sabai ka adiaknyo.

“Ciak. Lai acok pulo den danga padusi-padusi nan mampajuangkan jender tu. Barapi-rapi muncuangnyo mangecek, supayo haknyo samo jo laki-laki,” kato Mangkutak. Alun abih kecek Mangkutak lah dipotong dek si Sabai.

“Iyo! Bana baitu! Hak padusi musti samo jo laki-laki. Ai sangat satuju jo persamaan hak tu. Itu kini nan sadang Ai pajuangkan,” kato si Sabai tagak pinggang.

“Tapi ciak, padusi-padusi nan mampajuangkan jender tu tampak di den indak ado nan balaki surang juo. Si Yola kan dulu kareh angok lo mampajuangkan jender. Tapi lah dapek laki, inyo antok sajo lai. Kawan aciak nan banamo si Murni tu baitu pulo. Lah dapek laki, lah baranak pulo tu inyo aniang-aniang sajo makan pitih gaji lakinyo. Agak hati den, padusi-padusi nan kareh-kareh mampajuangkan jender tu cuma malakik dapek laki,” kato Mangkutak serius.

“Kambiang waang! Mantang-mantang Ai alun balaki, lalu waang mangecek saroman tu! Ai indak namuah balaki lai tahu waang sababnyo ndak! Indak laki-laki nan kamalamar Ai doh! “ hariak si Sabai.

“O, jadi aciak nan ka malamar laki-laki? Itu mukasuiknyo persamaan hak tu? Iyo lai ado laki-laki nan namuah dilamar dek padusi?” kato Mangkutak agak babisiak, takuik kakaknyo tu malu dek urang.

“Kambiaang waang! Pandai pulo waang mangaritik tokoh pejuang jender! Ai tanggaan kodek ko di tangah hotel ko baru waang tahu! Lai tahu waang Mang, Ai kini lah manjadi ketua! Ai nan ka mangibarkan bender jender tu! Padusi harus samo jo laki-laki! Kalau indak baitu, parcuma sajo Ai manembak Rajo Nan Panjang. Ai dipilih jadi ketua dek karano itulah! Dek karano Ai barani manembak laki-laki!”

“Ciak. Kok dapek laki aciak bisuak, lai ka saroman iko juo sumangaik aciak mampajuangkan jender tu?” tanyo Mangkutak.

“Tagantuang sia nan kajadi laki Ai,” kato si Sabai tibo-tibo taisak. Ruponyo si Sabai manahan tangih, dek karano adiaknyo manganaan bahaso inyo alun balaki juo sampai kini lai. “Kamari bedo Ai kini mah Mang. Kok ka balaki umua lah talonsong,” sambuang si Sabai.

Kan iyo tu ha! Takok di den. Aciak mampajuangkan jender tu dek karano indak dapek laki. Iyo ndak? Taruih tarang sajo lah, ciak,” kata Mangkutak.

“Iyo susah kalau awak nak ka bataruih tarang tu ndak Mang?” kecek si Sabai lambek-lambek. “Sia laki den ancak Mang?” tanyo si Sabai.

“Tukang kaba. Inyo nan pandai mangarang-ngarang curito! Bialah nyo kabakan pulo bahaso si Sabai kini lah kabalaki lai. Inyo indak kamanembak-nembak urang lai doh,” jawek Mangkutak.

“Muncuang waang tu Mang! Muncuang waang tu indak babandrol! Kakak kontan waang sendiri waang kritik juo!” kato si Sabai sambia maapuih paluah katiaknyo.

Mangkutak malengoang ka kida, dek karano si Sabai tagak sabalah suok.

*


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: