Oleh: Wisran Hadi | 31 Mei 2009

TARAGAK NAK JADI MENTRI PULO WAANG, MANGKUTAK?

Kabagalau 31-05-09

TARAGAK NAK JADI MENTRI PULO WAANG, MANGKUTAK?

Nan salamoko, nan satahu Sabai, Mangkutak bajunyo merah, bakain saruang ijau pucuak, bakopiah itam, batarompa sapik. Tapi sajak sabulan nan lapeh, baju Mangkutak lah batuka. Babaju ijau langik, basaruang balang-balang, basipatu kulik. Barubah bana lagaknyo tu kini. Urang di kampuang banyak nan eboh. Apo garan nan lah tajadi, mako Mangkutak roman tibo-tibo se batuka colok bajunyo.

Sabai Nan Aluih indak tahan mandanga gunjiang urang di lapau-lapau jo di pamatang sawah pakaro Mangkutak batuka baju tu. Mako bajalan malamlah Sabai samo surang mancari dima Mangkutak tu kini. Iyo lai di rumah bininyo juo laloknyo lai atau lah lalok di biliak padusi lain.

Lah saminggu dek mancari, mulai dari subarang aie, taruih ka sawah satampang baniah, babelok ka surau teleang, mandaki ka picuran tujuah, naik janjang rumah gadang sitinjau lauik, sampai ka baliak lapiak, dek barakaik yakin, kasudahannyo Sabai batamu juo jo adiaknyo nan santiang tu.

“Mang. Lah eboh urang sanagari Minangkabau ko dek ulah waang mah. Apo sabananyo nan tajadi?” tanyo Sabai.

“Baa mangko eboh. Indak ado karajo lain urang awak ko lai, mako suko bana mancikaraui urang lain?” baleh Mangkutak.

“Indak mancikaraui doh diak. Tapi lah barubah bana waang kini,” jawek Sabai.

“Barubah baa waden. Roman tu juo iduik den baru,” kato Mangkutak.

“Dek sari waang kailie ka mudiak babaju merah, bakain ijau pucuak, bakopiah itam, batarompa sapik. Gagah tampak dek urang. Dek karano itu waang dipiliah urang manjadi urang nomor satu di nagari ko,” kato Sabai.

“Tu baa lai?” tanyo Mangkutak.

“E, tibo-tibo se waang lah batuka baju, jo baju ijau lauik. Roman baju urang kabanyak an. Gunjiang urang, baa mangko baganti baju bana si Mangkutak. Lah sampik dek inyo baju merah tu? Indak katuju dek inyo baju merah tu lai? Padohal baju merah tu mintuonyo bana nan mambalian, perai, bahkan nyo agiah pulo pitih sagopek dek mintuo tu. Indak do kalua pitih waang sarimih juo doh. Kini baju lah batuka? Lah babini duo Mangkutak tu ndak? Baitu bana ciloteh urang di lapau-lapau,” kato Sabai.

“Ciak soal waden batuka baju, indak waden bagai nan mamintak doh. Waden diagiah urang. Urang baragiah ka ditulak? Lai ado doa panulak rasaki?” jawek Mangkutak tasingguang karuntuang miangnyo.

“Kalau lai pas baju waang pakai tantu lai indak baa. Ko baju tu waang pakai roman baju basalang. Indak manakah waang mamakai nyo doh. Kama waang campak an baju merah nan diagiah mintuo waang dek sari tu?” baleh Sabai.

“Baju merah dari mintuo den tu lai waden pakai. Ko ha, caliak bana dek aciak. Di lua iyo ijau langik baju den, tapi di dalam tatap baju merah,” jawek Mangkutak.

“O, jadi baju waang balampih duo? Baa? Dek taragak na jadi mentri pulo waang?” tanyo Sabai.

“Jadi manteri? Apo hubuangannyo?” kato Mangkutak baleh batanyo.

“Atau nak manyanangan hati urang kampuang. Mambangkik batang tarandam?” tanyo Sabai.

“Apo pulo kaitannyo antaro waden babaju duo lampih jo mambangkik batang tarandam?” baleh Mangkutak.

“Waang taruih tarang se lah Mang. Apo mukasuik waang mamakai baju ijau langik nan lapang roman baju basalang tu? Nak gaya-gaya se? Nak ikuik tren anak mudo pulo? Nak mambuek kejutan, supayo namo waang tatap disabuik-sabuik urang?” tanyo Sabai.

“Sabalun waden mamakai baju ijau langik ko waden bamimpi. Datang urang tengi gadang, nyo suruah waden mamakai baju ijau langik ko. Kalau indak namuah, angok dek ka dicabuik, anak bini den kadianiayo. Waden indak bisa mintak tolong. Ka mamakiak, suaro den ilang, angok den sasak. Paginyo den caliak, di ateh meja lah talatak se baju ijau langik tu. Waden manggigie dek takuik, kasudahannyo waden soroangan capek-capek baju tu. Indak talakik waden mambakuka baju merah nan den pakai salamo ko doh,” kato Mangkutak mangecek sasak angok saroman urang dikaja hantu.

“Kalau baitu kajadiannyo, yakin Ai, ka jadi menteri waang isuak mah,” solo Sabai jo gadang hati.

“Kok ka jadi apo waden isuak, nan jaleh waden indak mamintak,” kato Mangkutak basiragu.

“Kok jadi menteri bana waang isuak, tapi indak bapandirian apo gunonyo?” kaluah Sabai samo surang. (WH)


Responses

  1. tulisan pak WN ko salut kito impropisasi yang luar biasa. untuk jadi pajaran jo kita – alam takambang jadi guru


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: