Oleh: Wisran Hadi | 31 Mei 2009

TEORI INDAK BAKARUNCIANGAN

Mangkutak banyak bana mambaco surek kaba minggu-minggu kapatangko. Sagalo merek surek kaba abih dibaconyo. Roman urang ka ujian sarjana pulo gayanyo. Dalam salah satu surek kaba basobok dek Mangkutak uraian tentang teori chaos. Dapek teori tu, langsuang Mangkutak manamui aciaknyo nan banamo Sabai Nan Aluih.

“Ciak. Kini ado teori baru nan sadang berkembang di dunia. Namo teori tu, teori chaos.

“E, Mang. Kini lah banyak urang nan sakik utak dek ulah banyak teori nan indak sasuai jo kenyataan. Kini waang tambah pulo ciek lai. Teori apo tadi? Chaos? Apo pulo jinih jihin nyo tu?” tanyo Sabai Nan Aluih sambia manyanggue rambuiknyo nan panjang tu.

“Teori chaos itu lah babarapo tahun dikambangkan urang di Amerika. Dalam teori chaos dikecek an, mungkin atau tidak mungkin suatu kejadian, dapek dibuktikan atau indak, nan jaleh pastilah ado hubungan satu kejadian dengan kejadian lain. Contohnya, kecek teori tu, dek karano sikue ramo-ramo mati di dalam rimbo di Argentina tu ha, tajadi banjir di India dan Bangladesh,” kutubah Mangkutak sambia tagak pinggang.

“Lai indak ka paniang awak dek teori-teori saroman tu?” tanyo Sabai.

“Dangalah dek acik elok-elok! Teori chaos tu adolah teori tantang mungkin jo tidak mungkin. Teori tu nan manjaleh an, bahaso banyak bana persoalan jo kajadian nan dapek dikaik-kaik an, nan bisa dihubuang-hubuangkan satu samo lain. Misalnyo, baa mangko gadang ikue baruak di Pariaman kutiko bulan sadang naiak? Ado hubungannyo indak? Baa mangko ado laki-laki nan mangidam kutiko bininyo mulai manganduang? Baa mangko kareh barang laki-laki kutiko mancaliak padusi mandi balimau di subarang batang aie? Padohal batang aie tu gadang. Baa mangko manggarik-garik jakun-jakun awak nan sadang manonton, kutiko urang sadang bapaluak-paluak an di dalam tipi. Cubo? Baa pandapek aciak?” kato Mangkutak.

“Gambar dalam tipi saroman itu, tantu iyo diak io,” jawek

“Aciak Sabai janyo denai. Awakden serius ko mah!  Co jawek tanyo den tadi dek aciak. Baa pandapek aciak tantang teori tu?” tanyo Mangkutak.

“Manuruik Ai, teori nan waang baco di surek kaba tu namonyo teori indak bakarunciangan! Teori ilik-ilik.”

“Contohnyo?”

“Dek karano duo gedung kamba di New York runtuah, minat investor manuruan masuak ka Indonesia. Laik ka masuak aka tu? Baitu bana kecek urang nan mangarati jo teori waang tu! Dek karano Pentagon diimpok Buing, ekspor sipatu ka Amerika manurun. Baa agak ati ang? Dek karano Megawati jadi presiden, saluruah anak-anak presiden kini lah maraso pulo nak jadi presiden. Dek karano pak Gamawan Fauzi diundang dek pak SBY mambaco deklarasi, saluruah urang Minang bangga maraso lah mambangkik batang tarandam,” jawek Sabai.

“Indak teori chaos sarupo nan dimukasuik tadi tudoh ciak oi,” rarau Mangkutak.

“Teori apo namonyo tu?” tanyo Sabai

“Itu namonyo teori nan indak bakarunciangan!”

“Kalau baitu lai sapandek awak mah ciak. Teori nan mangecek an bahaso pak Gamawan Fauzi nan salamoko didukuang PDIP tibo-tibo inyo langsuang baganti baju, bapidato di Banduang ateh suruhan pak SBY manyampaian deklarasi Partai Demokrat kaitannyo jo batang tarandam urang Minang nan alun bangkik-bangkik. Teori apo tadi kecek aciak?”

“Teori indak bakarunciangan! Di ma lai tanyo ka bajawek se. Indak paduli lai masuak aka atau indak,” jawek Sabai sambia mamelok i tali kurangnyo. (WH)

*


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: