Oleh: Wisran Hadi | 4 September 2010

KULIAH ADAT SINGKAS (kas)

Parintang Hari;  Jumat – 27 Agustus 2010

KAS  (Kuliah Adat Singkat)

Oleh: Wisran Hadi

Sambia manunggu wakatu babuko, Tuk Banabana manyuruah duduak kamakanan-kamanakannyo maadok ka inyo, samantaro Tuk Banabana duduak di ateh kurisi roda. Maklumlah Tuk Banabana lah mulai lumpuh, dilumpuhan dek persoalan-persoalan politik di rantau. Lumpuh bana alun lai, tapi lah mulai dilumpuhan.

Ikolah tanyo jawab di hari ka limo antaro Tuk Banabana jo kamanakannyo nan gilo-gilo aie tu.

“Kini ko waden ka maaja kalian lai jo pitatah pititih Minangkabau, nan sacaro pilosopis dalam bana aratinyo. Partamo. Rami lapau urang, palamak samba awak.”

“Apo tu mukasuiknyo Tuk.”

“Urang awak ko suko mambae lapau urang nan rami jo batu, sahinggo takuik urang masuak lapau tu. Langang jadinyo lapau tu. Mustinyo, kok rami lapau urang dek karano sambanyo lamak, mako awak musti labiah lamak pulo mambuek samba. Indak lapau urang nan dibae doh.”

“Kalau baitu awak musti balapau nasi lo Tuk? Modalnyo lai ado Tuk?”

“Sudah. Kepeang juo baru lai! Danga dek kalian ciek lai. Awak mandapek urang indak kailangan.”

“Apo pulo mukasuiknyo tu Tuk.”

“Jaan batanyo ka batanyo sajo! Sakali-sakali pikiekan pulo apo maknanyo. Lai tahu kalian, dek karano urang awak ko indak namuah bapikie tulah mako adat Minang ko samakin lamo samakin dangkal.”

“Adat ko dipikiekan atau diajalankan Tuk?”

“Indak dipikiekan, jadi kabau awak. Indak dijalankan, jadi rimau awak. Sudahlah. Ko ciek lai. Raso dibao naiak, pareso dibao turun.”

“Apo pulo palsapah nyo tu Tuk.”

“Ma jaleh di den. Kapatang ko baru dapek di den mah. Untuang urang lai ka maadoan kongres kebudayaan, tapaso banyak urang nan maapa papatah patitiah. Nan den sabuik sabanto ko apo nan dapek den hapal tadi malam mah.

“O, jadi inggo tu lo palajaran adat dari datuk nyo.”

“Jaan dikritik juo mamak kalian ko lai. Kini waden maagiah patatah-patitiah, kalian pulo nan manarangkan aratinyo. Jaan pandai-pandai mangaritik sajo. Danga elok-elok.”

“Jadi Tuk.”

“Anak dipangku kamanakan dibimbiang urang kampuang dipatenggangkan. Apo tu mukasuiknyo?”

“Indak mungkin dikarajoan dek ninik mamak doh Tuk.”

“Baa kok indak.”

“Anak tu lah gadih, kamanakan lah gadih pulo, urang kampuang gadih pulo. Baa kecek mamak ka mamangku jo mambimbiangnyo? Mamaknyo lah tujuh puluah tahun. Lai indak dikecek an urang beko mamak tu gaek gata nan mamapah tigo anak gadih sakali angkek?”

“Sudah! Haniang kalian! Bata puaso den dek kalian mah!” ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: