Oleh: Wisran Hadi | 4 September 2010

Labai Lantera Pulang

LABAI LANTERA PULANG

Oleh: Wisran Hadi

Urang banyak tarutamo urang-urang surau hanyo tahu bahaso Labai Lantera beredar dari surau ka surau sajo. Ilie mudiak manjinjiang lantera. Dulu iyo baitu. Kini indak lai. Labai Lantera kini lah lamo marantau, saroman urang Minang lainnyo nan pai marantau. Rantaunyo Labai Lantera tatap sajo dari surau ka surau nan ado di rantau tu. Artinyo bana, dunia rantau Labai Lantera tatap sajo dunia surau saroman di kampuangnyo.

Puaso kini, Labai Lantera pulang dari rantaunyo. Labai pulang jo niat nan gadang. Jo lanteranyo tu, inyo nak manarangi sagalo suduik kampuang nan kalam-kalam. Nak manarangi hati urang nan samak-samak. Sagalo nan gelap, nan kalam, nan tarang-tarang kain, ka dicolok, ka ditarangi.

Tibo di kampuang, hari lah mulai patang. Labai heran, baa mangko urang-urang alun juo lai mamasang lampu. Urang-urang lalu lalang sajo kaniak kumari saroman hari ko indak ka malam. Saroman hari ko ka tarang taruih se.

Labai maiduik an lanteranyo. Lantera iduik inyo mulai bajalan. Tanyato lampu listrik di satiok rumah lah diiduik an urang pulo. Labai tacangang mancaliak kampuang lah tarang roman siang hari dek cahayo lampu lisrik. “E, lah labiah dulu pulo urang kampuang ko balistrik mah,” bisiak Labai samo surang. “Awak sangko urang di rantau sajo nan takuik kalam,” tukuak Labai ka badan dirinyo.

Walau lah sambilan tahu marantau, namun pangajian Labai Lantera tatap indak barubah. Labai samakin yakin, bahaso ummat ko harus manjalankan ugamo manuruik sunnah. Artinyo bana, ummat harus maniru manuladan apo nan dikarajoan rasulnyo. Itulah sababnyo, Labai indak namuah lai naiak kapatabang, indak namuah naiak kapa, indak namuah pakai senter, bahkan indak namuah lai basipatu. Sabab, kapatabang, kapa, senter, sipatu lokak, adolah bid’ah urang di zaman modern.

Sajak pulang dari rantau, Labai Lantera saroman urang baru mandapek semangat dalam badakwah. Labiah hebat pulo lai semangat tu dibandiang sabalun pai marantau. Ilie mudiak manjinjiang lantera, indak paduli siang atau malam. Kutiko iyo digalak an urang, mangecek an bahaso Labai Lantera lah katinggalan garobak dalam manafsirkan ajaran ugamo, Labai agak tasingguang.

“Sayo mangko diimbauan dek urang banyak Labai Lantera dek karano sayo taruih manjinjiang lantera kama pai. Sayo indak paduli. Sayo handak manarangi baiak siang ataupun malam sagalo ajaran jo amalan nan indak sasuai jo sunnah,” jawek Labai agak berang kutiko urang indak juo baranti mangaritik kalakuan Labai.

“Dalam perilaku sahari-hari,” kato Labai mulai bakatubah. “awak harus maniru apo nan dikarajoan nabi. Indak ado hadist nan mangecek an bahaso nabi kutiko babuko puaso, makan mamakai sendok apolai sendok jo garapu. Kini urang makan babuko saroman ka mandabiah urang. Sudahlah pakai sendok, garapu, balatak an pulo pisau maja di dakek piriang,” lanjuik Labai.

Simalanca sato mandanga kutubah tu. Langsuang Malanca mandakek ka Labai. Babisiak. Bisiak Sungai Pua. Labiah karek bunyi bisiaknyo pado buah eceknyo.

“Labai. Kok indak buliah awak makan pakai sendok, jo apo awak makan cindua patimura?” ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: