Oleh: Wisran Hadi | 4 September 2010

LAI BARA DATUAK MANGIRIM PITIH KA KAMPUANG?

Parintang Hari;  Rabu – 25 Agustus 2010

LAI BARA DATUAK MANGIRIM PITIH KA KAMPUANG?

Oleh: Wisran Hadi

Tuk Pucuak pulang. Nyo caliak sagalo pucuak nan ado, tanyato lah jadi karisiak sadonyo. Salamo di kampuang, Tuk Pucuak mintak diiringan kama inyo pai dek sagalo urang-urang takamuko, tokoh masyarakat, tokoh pemuda, tokoh-tokoh lain. Urang-urang kampuang patuah. Maklumlah lah lamo Tuk Pucuak di rantau, pangalaman banyak, pitih sagudang, relasi bajibun, tantu sagalo urang di kampuang sagan. Jaankan ka manjawek kecek Tuk Pucuak, dapek sajo basalam jo datuak tu, lah suatu rahmat di bulan puaso ko. Baitu bana hormatnyo urang di kampuang ka urang nan pulang dari rantau.

Mulo-mulo Tuk Pucuak pai mancaliak musajik Jamiak nan talatak di lereang bukik di tapi tabiang. Tagak pinggang Tuk Pucuak di tangah laman.

“Musajik ko adolah tampek urang kampuang baibadat. Sumbayang, mangaji, baraja agamo. Mustinyo musajik ko lah labiah rancak daripado iko. Sajak ambo marantau sampai kini, indak barubah juo musajik ko. Bahkan samakin indak tapaliharo. Laman lah marimbo dek rumpuik. Kubah lah tahereang. Dindiang-dindiang indak lai bacat. Kumuah! Buruak! Iko ka jadi cerminan masyarakat nan mangecek an bahaso dirinyo baradat jo baugamo? Apo sajo karajo malin, garin, imam, ustad, ulama nan ado di nagariko? Lalok? Barasian? ” kato Tuk Pucuak.

Urang nan mandanga haniang sajo. Manakuakan kapalo. Maangguak-angguak.

Sudah tu Tuk Pucuak bagageh pai mancaliak Balai Adat. Urang nan mulo-mulo banyak mairiangan, surang surang pai baitu sajo. Tuk Pucuak bapangku tangan mancaliak Balai Adat nan alah condoang tu.

“Balai Adat alah condoang ka barat! Baa mangko saroman ko bana adat awak? Di mano datuak-datuak jo pangulu. Manyo manti, malin, dubalang. Bundo Kanduang sadang manga tu kini! Balai Adat ko lah musti dipeloki. Musti direstorasi. Musti reaktialisasi. Mesti di rekonstruksi. Mambiaan Balai Adat lapuak surang adolah kesalahan budaya nan luar biasa!” kato Tuk Pucuak.

Urang mandanga haniang sajo. Manakuakan kapalo. Maangguak-angguak. Sudah tu Tuk Pucuak pai mancaliak rumah-rumah gadang. Urang nan mairiangkan samakin langang. Nan tingga mairiangkan hanyo surang urang tuo. Urang tu galak-galak surang sajo mancaliak tingkah Tuk Pucuak.

Sampai di laman rumah gadang, Tuk Pucuak mandaceh! “Kalau bantuak ko rumah adat Minangkabau, sabanta lai adat awak runtuah! Picayolah,” kato Tuk Pucuak. Samakin mangecek inyo samakin kareh suaronyo. Manunjuak ka ilie ka mudiak. Nan iko salah, nan itu indak batua. Kutiko Tuk Pucuak lah paneh berang-berang, mako mangeceklah urang tuo tadi, batanyo ka Tuk Pucuak.

“Lai bara datuak mangirim pitih ka kampuang?” tanyo urang tuo tu. Tuk Pucuak tagagau.

“Baa baitu?” tanyo Tuk Pucuak.

“Kalau indak panah mangirim pitih ka kampuang, indak ado hak datuak berang-berang ka kami doh,” kato urang tuo galak sengeang, sambia malangkah maninggakan Tuk Pucuak. ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: