Oleh: Wisran Hadi | 4 September 2010

Manjua Ayat Jaan Sapotong-sapotong

MANJUA AYAT JAAN SAPOTONG-SAPOTONG

Oleh: Wisran Hadi

Dek urang Minang, nan paliang nikmat dalam bulan puaso adolah babuko basamo jo sanak keluarga, anak baranak, kaum famili samo sadarah, sasuku, sakampuang. Baiak jo nan jauah apolai jo nan dakek.  Babuko basamo roman tu lah nan kini ka diadokan dek Rangkayo Sati, kapalo kaum suku Cadang. Rangkayo Sati iyo bak namo bak nasibnyo, kayo jo sati pulo, mako babuko basamo tu nyo urus sajo surang. Inyo ka mambuek kejutan, surprais, di hari puaso nan ka anam baleh ko.

Sagalo macam pabukoan nyo pasan. Sate, ado garobak sate nan tagak di laman. Cindua, ado garobak cindua tagak di laman. Katan durian, ado saungguak tagak durian di tapi paga. Pokoknyo sagalo makanan pabukoan lah basiapan. Baitu juo nasi nan kadimakan sasudah babuko. Nasi dibuek pulo saroman urang Kelantan Malaysia manyadioan nasi, bawarna-warna. Mulai nasiputiah, nasikuniang, nasiitam, nasimerah. Manuruik Rangkayo Sati, nan indak tasadioan cuma nasional nyo. Sudahlah maha indak pulo ado urang manjua di pasa. “Baa juo lai. Indak banasional bagai indak hanti,” garutok Rangkayo Sati samo surang.

Untuk maimbau sagalo dunsanak babuko basamo tu, ditunjuk Ketua, bakeh ketua tim sukses kapatangko, kutiko Rangkayo Sati kalah dalam pemilukada. Tibo di hari H, Rangkayo Sati lah standbai. Pukue satangah anam hari, alun surang juo nan tibo. Lah pukue anam, indak juo ado nan mancogok. Sampai babunyi sirene tando babuko, nan ado hanyo Rangkayo Sati jo bininyo.

Sudah babuko, Rangkayo Sati tagak.             “Ketua! Kamari! Manyo dunsanak-dunsanak nan alah baimbau tu! Indak surang juo nan datang! Lai basampaian sagalo pasan den?” hariak Rangkayo Sati.

“Lai, Rangkayo,” jawek Ketua manggigie.

“Ulang! Apo apo sajo pasan waden nan lah basampaikan!”

“Partamo, mangecek an bahaso Rangkayo Sati di rumahnyo nan baru ka diadokan pangajian Ramadhan sasudah babuko, ustadnyo sangajo bana badatangan dari Mesir. Kaduo, Rangkayo Sati ka mambagi-bagian paket lebaran, barisi buku-buku agamo jo lanjo rayo. Katigo, sagalo nan gaek-gaek diagiah parsel, langsuang dianta sasudah sumbayang taraweh,” jawek Ketua.

“Bahaso hari ko babuko basamo lai basampaian?” tanyo Rangkayo Sati.

“Itu kan pasan nan ka ampek.”

“Jadi bara pasan nan alah basampaian?”

“Tigo. Nan ka ampek tu sajo nan alun.”

“Panduto! Pasan nan kaampek tu nan paliang penting, itu bana nan indak waang sampaian. Dusta! Dusta!”

“Kalau indak sadonyo pasan awak sampaian apo tamasuak baduto juo tu Rangkayo. Pasan ampek nan awak sampaian tigo, kan lah jadi tu.”

“Ya Allah. Ampun den. Ikolah akibatnyo, kalau tabiaso manjua ayat sapotong-sapotong! Kini baru jaleh bana di den, dek manjua ayat sapotong-potong ikolah nan manjadi panyabab baa mangko banyak urang Islam nan sasek, kalah, bodoh, handia, panakuik!” ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: