Oleh: Wisran Hadi | 4 September 2010

Nan Paralu Dipareso Kutiko Lah Jago

Nan Paralu Dipareso Kutiko Lah Jago.

Oleh; Wisran Hadi

Kebiasaan nan kurang rancak nan acok dibuek urang awak dalam bulan puaso adolah lalok sasudah sumbayang subuh. Kadang-kadang baru tajago kutiko wakatu sumbayang Zuhur ka masuak. Kutiko jago, kapalo paniang, pangana indak di awak. Sabalun banyak nan mangajuik an awak tantang diri awak surang, mako nan paralu awak pareso tiok jago lalok adolah; 1. Kapalo awak ko iyo lai talatak juo di ateh lihie atau lah pindah ka ampu kaki. 2. Nan awak pijak ko iyo lai tanah pusako awak juo lai, atau tapijak di tanah urang lain. 3. Langkah awak ko lai kamuko juo manuruik arah jalan atau asa malangkah-langkah sajo. 4. Anak kamanakan awak lai indak nyo pajua balian dek urang manggaleh. 5. Angok awak ko lai manampuah iduang juo baru lai atau alah angok-angok i. 6. Kabek pinggang awak lai arek juo baru lai, atau sirawa tu nan alah loloh. 7. Suok awak lai ka muncuang juo baru lai, lai indak manyuok an muncuang urang lain. 8. Nan awak makan ko lai nasi juo baru lai, lai indak tamakan barang-barang bangunan. 9. Nan awak caliak ko lai urang juo baru lai, atau lah bantuak hantu kasadonyo. 10. Lidah awak ko iyo lai sabana lidah, atau lah batuka jo lidah ula.

Kebiasaan lain nan acok pulo mambuek urang paniang dek ulah awak adolah kutiko awak sok-sok manjadi urang Minang, babaso Minang, tu bacuboan pulo manterjemahannyo ka bahaso Inggeris. Ikolah kato-kato nan indak buliah dibahaso Indonesiakan. Tapi indak baa juo dicubo, manjalang tabuah babunyi; 1. Namun samantangpun baitu, jikok digantuang denai tinggi, dibuang denai jauah. 2. Nan sakarang kini nangko, iduik nan indak lai bakarunciangan. 3. Manolah adiak kanduang janyo denai. 4. Taimpik nak diateh takuruang nak dilua. 5. Di pinang nan linggayuran, di sikaduduak bapilin tigo. 6. Lidahnyo bagai ampalam masak, jarinyo bagai duri landak. 7. Anak aji samo jo anak jawi aji masuak parak aji samo jo bini aji. 8. Dek lamo lambek nan bak kian, tahun baganti musim bakisa. 9. Jikok lai sayang jo badan diri, molah kito babaliak ka nagari. 10. Babaliak ka nagari samo jo babaliak ka surau, babaliak ka surau samo jo kito lah babaliak baugamo, babaliak baugamo aratino bana salamoko awak lah kalua dari ugamo tu.

Sajak pilkada lah usai, banyak urang bapangkek batambah. Samakin tenggi pangkeknyo samakin banyak se parintahnyo. Mantang-mantang lah tenggi pangkek awak, jaan cubo-cubo pulo manyuruah urang untuk; 1. Maagiah sipatu kapalo kapalo nagari. 2. Manyuruah urangĀ  sadang sumbayang. 3.Manyuruah tantara sadang babarih 4. Mangganti baruak jo cigak. 5. Maambuih nasi dingin. 6. Maantak oto tagak. 7. Sato dalam rapek karo. 8. Mancirik an pariuak. 9. Manyuruah urang sadang sakik gigi supayo galak. 10. Mamberangi anggota dewan.

Banyak urang Minang ko nan pagarah. Mambuek lucu. Supayo awak bisa tahibur, galak basamo-samo. Awak galitiak katiak urang. Inyo tagali, galak, dan awakpun galak. Namun, indak sadonyo urang nan buliah digalitiak katiaknyo. Di antaronyo; 1. Urang ka basin. 2. Urang sadang manyulo karambia. 3. Urang kamatian bini. 4. Urang sadang maatua panjaik. 5. Urang sakik gigi. 6. Urang sadang manyuruak. 7. Urang sadang makan sagun-sagun. 8. Urang sadang mamakai kacomato itam tangah malam. 9. Urang sadang maetong lansek. 10. Urang sadang ditanyo polisi. ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: