Oleh: Wisran Hadi | 4 September 2010

TUAK AMBUANG BALI PABUKOAN

Parintang Hari  Senin – 23 Agustus 2010

TUAK AMBUANG BALI PABUKOAN

Oleh: Wisran Hadi

Sajak mulai babuko di hari partamo puaso, Tuak Ambuang bana-bana lapeh salero. Roman babuko tu samacam wisata kuliner. Mungkin kutiko di rantau kapatang-kapatang ko, indak ado makanan salamak, sakatuju dek salero Tuak Ambuang dibandiang jo nan ado di kampuang.

Baganti taruih pabukoan nan dibao Tuak Ambuang dari pasa. Mulai dari bubua candin, kolak pisang, sanok, kampiun, katupek gulai paku, pical, bika simariana, babagai, iyo sabana babagai. Alun lai samba. Mulai dari gulai tambunsu sampai randang baluik. Sambalado tanak sampai sambalado bada. Ayam, dagiang, talua, indak dek Tuak Ambuang doh. Inyo darah tenggi lo stek.

Balain hari balain macam pabukoan. Mungkin sasudah puaso isuak Tuak Ambuang batambah barek badannyo atau gulo darahnyo naiak. Tapi paduli apo. Dek Tuak Ambuang persoalannyo lah jaleh, bahaso babuko adolah rahmat nan diizinkan oleh Tuhan untuk mamakan pabukoan nan halal, apo nan katuju. Nan dilarang kalau makanan tu mubazir, balabih-labihan, banyak tabuang pado nan masuak paruik.

Kabaa juo, urang nan gadang salero kasudahannyo kanai juo batunyo. Bak kecek Tuak Ambuang juo, sapandai-pandai tupai malompek, jatuah juo, sajauh-jauah atlit awak malompek, kasudahannyo kalah juo.

Maaf, kaum muslimin muslimat nan kini sadang mananti wakatu babuiko. Iko bukan gunjiang, bukan gosip, bukan gibah. Tapi curito sabananyo nan dicaritoan dek Tuak Ambuang sandiri tantang pangalamannyo mambali pabukoan di pasa Sicincin. Alun juo abih galaknyo sampai kini mancaritoan pangalamannyo tu. Baitu curitonyo;

Sampai di pasa Sicincin, si sopir nyo suruah mamparantian oto barunyo tu. Oto baru tu mukasuiknyo oto nan baru disalangan kawan di rantau untuak sangajo pulang ka kampuang. Oto baranti, pintu kaco dibukak, bagaduru padusi-padusi mandakek maonyok an galeh. Mulai dari karupuak binjek, lamang angek, kacang tojin, pinukuik, paniaram, sadonyo mambangkik an salero Tuak Ambuang.

Tibo-tibo bangkik se salero Tuak Ambuang mancaliak talua asin nan dionyok an urang manggaleh jo pancin ijau.

“Talua!” kato Tuak Ambuang ka padusi nan manggaleh talua asin tu.

Padusi tu bagageh mandakek ka pintu oto. “Panas juga baru Mas. Belilah agak tiga. Indak berapa uangnyo doh Mas,” kato padusi tu jo bahaso Indonesia logat Sicincin maagoaan talua asin.

“Jaan ba Mas Mas lo ka den lai. Waden ko lah datuak komah,”  hariak Tuak Ambuang. Nyo ambiak talua asin tu dek Tuak Ambuang. Iyo angek juo baru. Tapi tabik karuik kaniang Tuak Ambuang mancaliak talua tu.

“Baa ketek bana talu asin kau ko?” tanyo Tuak Ambuang.

“Ondeh Tuak,” kato padusi tu. “Kok gadang pulo pado iko lai, tantu baoperasi sesar pulo itiak awak dulu baru dapek talua,” tukuak padusi tu.

Sopir nan gilo-gilo aie tabarai galaknyo. Tuak Ambuang galak sajadi-jadinyo.

“Lai indak ka gilo den dek kau tibo di Padang ko? Ka baoperasi sesar pulo ikue itiak kau dulu,” kato Tuak Ambuang. ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: