Oleh: Wisran Hadi | 5 September 2010

Labai Panjang Jangguik

Parintang hari  11 Agustus 2010

LABAI PANJANG JANGGUIK

Oleh: Wisran Hadi

Kok ado urang Minang nan indak kenal jo Labai Panjang Jangguik, tandonyo urang tu alun panah lalok di surau mandanga urang mambaco kaba, atau buliah dikecek an bahaso urang tu alun mangarati jo sastra Minang, indak abeh bana dinyo tantang kekuatan dan keunggulan kebudayaan Minang. Labai Panjang Jangguik adolah urang siak, maaja sumbayang jo mangaji di surau. Banyak anak sasiannyo, sakambuik anak muriknyo bajibun banyak jamaahnyo. Satiok puaso tibo, namo Labai Panjang Jangguik langsuang takana dek urang sakampuang, dek ulah pantunnyo nan tapek bana manyindia kalakuan urang Minang  maso itu.

Sajak malam tadi, sajak sanjo sampai makan paraksiang tibo, Labai lah bajalan pulo baliak sakaliliang kampuang. Maingek an jamaah jo murik-muriknya. bahaso awak lah mulai masuak puaso. Masuak bulan Ramadhan. Bulan nan dibanjiri jo berkah sarato ampunan.

Caro Labai Panjang Jangguik maingek an bahaso awak lah masuak puaso, atau awak kini lah masuak wakatu sumbayang, indak jo kutubah jo hadist-hadist nan babahaso Arab, indak jo ancaman narako, karak narako, narako weil, tapi jo bapantunjo bandendang. Saroman ko ha;

Baoto lai manambang indak

Babendi juo kasudahannyo

Puaso lai sumbayang indak

Marugi juo kasudahannyo

Kutiko ado bujang-bujang tangguang nan sadang bakapusu di lapai-lapau mancaliak goyang penyanyi dangdut di tipi, Labai langsuang badendang sambia lalu di muko lapau tu.

Asam kadih asam galugua

Katigo asam si riang-riang

Manangih maik di pintu kubua

Mangana badan indak sumbayang

Namun samantangun baitu, kadang-kadang tibo juo mantiko Labai nan sadang ngetren tu. Kutiko dicaliaknyo bujang gadih bajalan bapaluak-paluak sapanjang gang rumah perumnas tampek Labai mangontrak ciek biliak untuk tampek inyo maunjuan badan, Labai langsuang mancigok di jandela sambia mauruik-uruik jangguiknyo, mamantuni paja-paja nan sadang kasmaran tu.

Sajak denia gubalo itiak

Ka Bayang denai dakikan

Indak den ka Ngalau lai

Sajak denai cinto ka adiak

Sumbayang denai antikan

Indak den ka surau lai

Tabedo urang ka Labai. Ka berang indak bisa. Ka marah apo lai. Kok ka galak, awak bana nan kanai sindia. Namun samantangpun baitu, dek karano Labai tu punyo ilimu nan langkok, aqidah santiang, syarak indak tabado, amalan bukan main, suko galak sengeang sambia mauruik jangguiknyo nan putih tu, urang labiah suko mandanga pantun Labai daripado mananam banci kainyo.***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: