Oleh: Wisran Hadi | 5 September 2010

MALIN DEMAN LAH SABANA JADI MALIN

Parintangari 13 Agust. 2010

MALIN DEMAN LAH SABANA JADI MALIN

Oleh: Wisran Hadi

Kok iyo banalah Malin Deman nan sampai kini tatap sajo dicaritokan tukang kaba sebagai urang Minang nan sukses mancilok baju karamat nan bisa mambao urang tabang ka langik Sonsoang Barat milik Puti Bungsu, nan jaleh kini, samanjak bulan puaso masuak Malin Deman tu indak namuah mancilok-cilok lai. Inyo lah sabana malin, bak namo bak kalakuannyo. Indak roman dulu, awak lai bagala Malin tapi jaankan puaso, kama madok Qiblat sajo indak tahu.

Saluruah urang Minang baiak di ranah mau pun di rantau gadang bana hatinyo. Sadangkan Malin Deman, si pancilok gadang, lai namuah tobat. Lai namuah puaso, lah mulai sumbayang. Apo lai urang nan banyak ko. Kini takaba pulo Malin Deman lah mandaftar nak naiak haji ka Makkah. Tapi dek karano harus antri sampai tahun 2015, Malin Deman ragu, lai kaiduik juo inyo kutiko tahun 2015 tu. Mako tak jadi inyo mandaftar. Rencananyo kutiko urang basapa isuak, inyo ka pai sajo ka Ulakan agak tujuah kali. Tujuah kali ka Ulakan kan lah samo jo pai ka Makkah sakali. Baitu bana pangajaran ugamo nan diyakininyo, nan didapeknyo dari guru-gurunyo, dari guru dek gurunyo, di Surau Buluah.

Namun samantangpun baitu, bahaso nan manunggu dunia indak manusia sajo, indak malaikat sajo, tapi basarato jo jihin setan bagai. Sajak Malin Deman tobat, padusi-padusi indak cameh bana lai bajunyo ka dicilok dek laki-laki saroman Malin Deman. Lanteh bana angan mereka tu kini. Mandi di tapian, di Pancuran Tujuah sasuko hati sajo. Baju, kain, salendang, kutang, nyo paleak-leak an sapanuah tabiang di panurunan tapian.

Dek ulah roman tu, lah tabedo sagalo ninik-mamak,alim-ulama, cadiak-pandai sa alam Minangkabau ko. Dari satu sisi iyo, Malin Deman lah menerapkan aturan jo nilai-nilai Adat basandi syara, Syara’ basandi Kitabullah. Tapi akibat Malin Deman indak mancilok baju paja-paja tu, lah samakin indak bakatantuan pakaian padusi-padusi di nagari ko lai. Lieklah kutiko pai taraweh. Balipstik, basarawa jin sampik, babaju jarang, tampak pusek, balampok se saketek jo talakuang balipek.

Kutiko Malin Deman basobok Simalanca, Simalanca langsuang komplen.

“Malin. Nan Malin iyolah ka masuak sarugo. Lah sumbayang lah puaso. Indak mancilok baju Puti Bungsu jo paja-paja tu lai. Tapi akibat Malin indak namuah mancilok baju mereka tu, komah jadinyo. Lah roman urang pai manonton orgen tunggal paja-paja tu bapakaian,” kato Simalanca.

“Inyo baitu mah Malin. Indak ado urang nan indak baniat masuak sarugo doh. Tapi jaan sampai dek karano niat Malin surang sajo nak masuak sarugo, nan banyak masuak narako,” tukuak Labai Panjang Jangguik.

“Jadi baa nan rancak? Waden taruih mancilok dan masuak narako surang? Nan banyak ko bialah masuak sarugo sadonyo? Baitu nan katuju dek Labai?” kato Malin.

“Kok dapek iyo basamo-samo juo awak masuak sarugo. Saroman hotel bintang limo mah Malin. Bajuta kamar hotel disadioan dek Tuhan untuak urang-urang saroman awak. Kok kami baduao sajo nan masuak hotel mewah tu, tantu langang bana kami di sinan,” solo Simalanca.

“Jadi bialah waden masuak narako surang? Bialah waden saroman kacang diabuih ciek dipanggang dek api narako tu?  Baitu nan katuju dek kalian,” kato Malin Deman taisak manahan berang. ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: