Oleh: Wisran Hadi | 5 September 2010

SIMALANCA INDAK LAI BERSELANCAR

Parintangari 12 Agust. 2010

SIMALANCA INDAK LAI BERSELANCAR

Oleh; Wisran Hadi

Simalanca tu adolah sosok galie urang Minang sasiauak nan sabana galie, kalau dicari padanan kato galie tu jo bahaso kini adaloh; suko mambohongi publik. Urang takicuah tapi maraso indak dikicuah. Inyo mandapek urang indak kailangan.

Kutiko kapatang inyo manjuakaie ka sumbayang taraweh, kopiahnyo ilang. Dek kopiahnyo ilang di tampek nan kalam, nyo cari di tampek tarang. “Soal dima ilangnyo, bilo, bara nan ilang itu bukan urusan pihak nan mancari,” katonyo manjawek tanyo urang.

Inyo ka mambagi-bagi pitih ka kamanakannyo kutiko rirayo isuak. Pitihnyo ado limo ribu. Supayo banyak, dituka nyo ka bank jo wang karateh limopuluah. Dek karano bank indak mancetak pitih karateh limo puluah, nyo kecek an bank tu lah bangkrut. “Iko skandal bank nan labiah babahayo pulo lai daripado skandal bank senturi,” katonyo kalua dari kantua bank tu.

Tadanga pulo dek Malanca kapatang, bahaso Presiden ka datang mambukak Kongres Kebudayaan. Kecek Simalanca kadatangan presiden tu adolah permintaan dari presiden tu bana. Dek karano dulu inyo banazar, kalau tapiliah jadi presiden, apo sajo kandak urang Minang ka panuhinyo.

Kutiko bini Simalanca pai ziarah ka kubua kaumnyo dan indak pulang-pulang salamo anam hari, nyo bae maluluang panjang, manangih babuah-buah bahaso inyo lai namuah manggantian lapiak. Kok dapek sabalun puaso. Tapi puaso lah duo hari masuak, nan lapiak alun juo tatuka salai juo lai.

Makonyo dikecek an Simalanca tu sosok urang Minang sasiuak nan sabananyo, dek karano Simalanca bapegang ka prinsip iduik urang Minang tu bana. Adat Basandi Syara’, Syara’Basandi Kibatubullah, manuruik inyo bukanlah prinsip iduik, tapi itu cuma palamak kecek urang-urang pandai untuk mandapek proyek. Nan prinsip iduik urang Minang tu adolah, nan sasuai alu jo patuik, sasuai patuik jo mungkin. Iduk baraka mati bariman.

Itulah sababnyo, inyo labiah khusyuk mambaco situs angek daripado sumbayang magrib di surau Teleng. Sahinggo namo Simalanca tu dituka dek urang warnet tampek langganannyo manjadi Peselancar. Hepta! Bahaso Minang nan alah disasuaian jo citarasa bahaso gaul.

Kini urang nan punyo warnet tu heran, baa mangko Simalanca indak berselancar lai. Lah duo hari. Kutiko ditanyo dek Labai Panjang Jangguik, baa mangko Simalanca indak lai berselancar, apokoh Simalanca lah mangganti identitasnyo dari urang Minang manjadi urang nan indak Minang, atau dek karano kecewa Kongres Kebudayaan diundur-undur? Simalanca langsuang baliak batanyo.

“Jadi baa bana indentitas urang Minang ko dek Labai?” tanyo Simalanca.

“Indentitas urang Minang sasisuak nan tahu ambo nyo. Identitas urang Minang nan kini indak,” jawek Labai.

“Apo tu identitas urang Minang saisuak?” tanyo Simalaca.

“Maanggap puaso tu saroman ula. Dipacik an kapalonyo, dikabek ikuanyo, mati ula tu mah,” jawek Labai.

“Mukasuiknyo.

“Kalau puaso duopuluah sambilan hari, cukuik puaso di hari partamo jo hari akhir sajo. Puaso abih rirayo tibo. Tu, bamaaf-maafan awak lai,” jawek Labai.***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: