Oleh: Wisran Hadi | 30 April 2011

LAH JO DUKUN-DUKUN SATO MALIANG

Jilatang 06-02-11

LAH JO DUKUN-DUKUN SATO MALIANG

Oleh: Wisran Hadi

Banyak bana urang maliang kini. Sabalik. Lai ado juo nan bisa dimaliang, dimaliang! Nan bedo, indak surang juo nan bisa dituduah, sia nan jadi pamaliang tu. Baru se waden ka basorak bahaso ado urang maliang, urang tu langsuang manunjuak ka arah den. Menderita jiwa waden kini Tang.Adennak pai ka dukun mah, mintak tangka maliang,” kato si Jila.

“Jila, indak paralu pai ka dukun bana lai. Bini jo anak waang tu lah jadi tangka maliang mah.Apojuo lai.”

“Anak jo bini den jadi tangka maliang? Baa pulo curitonyo tu kawan,” tanyo si Jila.

“Dek sari waang taruih se mangaluah mangecek an bini jo anak waang nyinyia bana pakaro pitih. Taruih se inyo batanyo asa usua satiok pitih nan waang bao ka rumah. Akibatnyo waang tapaso hati-hati manarimo pitih urang,kan? Akibatnyo waang takuik mambae pitih kantua,kan?”

“Kalau soal itu, memang repot den. Labiah se pitih den saketek dari gaji, langsuang waden diselidiki, dipareso, saraso waden sadang maadok i urang Kapeka.”

“Kanrancak tu. Akibatnyo waang takuik manarimo pitih nan indak bakatantuan tukan? Artinyo bana, waang lah disalamaik an anak bini waang jadi pamaliang, lah disalamaikan keluarga waang sandiri jadi koruptor. Basyukurlah waang dapek anak jo bini nan saroman tu. Salamat waang dunia akhirat tumah,” kato si Atang bakatubah.

“Kanpaniang den manjawek tanyo mereka tu. Dari ma dapek pitih? Sia nan maagiah?Apoparalunyo urang tu baragiah?  Macam-macam lai tanyo mereka tu ka den. Tiok hari mereka batanyo. Sabalun den jawek, pertanyaan taruih se tibo. Katiko sadang makan, sasudah mandi, jago lalok, sadang lakek sarawa, nyo tanyo tauih. Ampun den.Adentantu harus manjalehan sadonyo sacaro jujur. Baduto se waden saketek, inyo curiga. Tanyo taruih. Saroman waden ko dapek bini tamakan ikua murai.

“Tanyato waang aman kinikan? Indak ado urang nan manuntuik-nuntuik waang,kan. Baiak jaksa, hakim apo lai indak ado baurusan jo waang.Kansanang tu. Lai tahu waang indak. Kawan-kawan den kini indak namuah lai lalok incek matonyo doh. Raso-raso katibo se surek panggilan dari pengadilan. Lah banyak nan sakik tu. Banyak nan pai barubek kaMalaysia, ka Singapura bagai. Pitih nan mereka maliang salamo ko lah abih dek barubek!” kato si Atang babisiak.

“Jadi, kalau baitu, indak paralu waden pai ka dukun lai mintak tangka maliang?” tanyo si Jila.

“E, Jila! Lai tahu waang ndak. Dukun nan waang bangga-banggaan tu lah masuak kandang situmbin pulo kini!” kecek si Atang.

“Ah, maa pulo,” kato si Jila indak picayo.

“Sumpah den! Inyo dihukum dek karano sato pulo maliang pitih kantua samo jo pegawai tinggi lain. Itulah, kalau indak suko mambaco koran. Indak tahu apo nan tajadi.”

“Dukun sato pulo maliang? Lah baa dunia awak kini ko Tang,” rauang si Jila sambia manungkuk ka meja.***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: