Oleh: Wisran Hadi | 30 April 2011

Jilatang 20-02-11

 GAJI BIALAH KETEK TAPI RASAKI BANYAK

Oleh: Wisran Hadi

Jila agak heran, baa caro kawan tu dapek mangumpuakan harato sabanyak tu bana. Rumah tujuah, oto sambilan, toko duobaleh, karateh saham salamari, rekening di bank ateh namo anak, namo abak, namo bini, namo kamanakan! Alun lai sawah, ladang, tanah, angkot, buskota, jo garobak sate sambilan puluah anam tu! padohal inyo baru tigo tahun manjadi anggota dewan.

“Baa caro waang dapek rasaki sabanyak tu Tang? Sayang bana Tuhan ka waang yo?” tanyo si Jila ka si Atang.

“Baa tadi? Sayang Tuhan ka waden?”

“Urang lah tunggang-tunggik sumbayang siang malam, rasakinyo sado nan dapek dimakan nyo juo baru lai. Tapi nan waang, balabihan bana sayang Tuhan bakeh waang. Rasaki banyak, malimpah-limpah, padohal satahu den, waang sumbayang indak, puaso antah bilo-bilo.”

“Soal rasaki, jaan disangkuik-sangkuik an jo sumbayang atau puaso.  Maa adoh urang sumbayang nan kayo? Urang nan kayo, urang nan mancari pitih.  Urang sumbayangkansumbayang, indak mungkin urang sadang sumbayang mancari pitih. Kalau ado urang sadang sumbayang mancari pitih, pasti bata sumbayangnyo?”

“Jaan batele juo lai kanti. Waden indak bacurito pakaro urang mancari pitih sadang sumbayang doh kawan.Nanden tanyoan dari mano asal kekayaan waang? Bara gaji waang sabulan? Itu nan den tanyo.”

“Waden ko samo juo jo pejabat-pejabat awak nan lain.”

“Samo baa?”

“Gaji bialah ketek, tapi rasaki banyak.”

“O, baitu?  Lalu, dari ma datangnyo rasaki nan banyak tu?”

“E, Jila. Bukan waang nan mamareso kekayaan den!  Waang bukan KPK! Waang rakyat, kini waden jadi pejabat!  Lai tahu waang ndak. Sagalo nan den dapek tu, hibah!”

“Ha? Hibah?  Baa pulo tu jalannyo mangko waang dapek hibah? Sia nan maagiah hibah ka waang?”

“Jila. Maaf an den Jila. Indak takana di den lai dari ma den dapek harato sabanyak ko. Lupo den.”

“Sajak harato pajabat mulai dipareso, waang lah dapek panyakik lupo pulo yo?”

“Jadi baa? Indak buliah urang ko lupo? Sadang sumbayang se lupo, dimaafkan dek Tuhan. Waden lupo, indak namuah pulo waang maafkan? Labiah hebat pulo waang dari Tuhan lai tu?”

“Litano Mayora Pion Permata Dewi Anggraini, paja kamek rancak nan waang suruak an di perumahan  Bungalow Indah tukanlai indak lupo-lupo doh?” tanyo si Jila sasudah mairuik kopinyo nan lah mulai dingin. Si Atang tagagau, tapi capek inyo dapek manguasai diri. Nyo rangguik an baju si Jila, nyo dakek an muncuangnyo ka taligo si Jila. Inyo babisiak sambia bacaruik.

“Sakali lai waang sabuik namo paja tu, waang den bunuah! Nan den suruak ankancieknyo! Daripado nan lain, nan sudah makan pinggan bacampak an,kanmasih elok waden lai.” ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: