Oleh: Wisran Hadi | 30 April 2011

Jilatang (16) 17-04-11

UNTUAK PANAMBAH GENGSI, PARALU AWAK BASANDIWARA

Kini Atang mulai mangarati, baa mangko urang Minang ko indak suko drama, indak suko sandiwara, indak suko tonil indak suko teater. Bukan karano inyo indak suko jo kesenian, tapi soal sandiwara manyandiwara lah taruih dibuek urang sajak dulu sampai kini. Satiok hari urang Minang tu basandiwara.

Manuruik Jila, bukannyo basandiwara urang Minang tu nan indak suko, tapi jadi panonton sandiwara itu inyo indak suko. Dek karano perbedaan pendapat tu, maka tajadilah patangkaran antaro Atang jo Jila. Dek karano inyo batangka pas kutiko listrik mati, indak tahu sia nan mangecek. Tapi nan jaleh, nan batangka tu Atang jo Jila.

“Kutiko mambuek paretongan kawin, mamak dari pihak nan marapulai mintak ka mamak dari pihak anak daro uang japutan. Misalnyo dimintak uang japutan tu 250 juta. Mamak pihak anak daro indak bisa mamanuhi permintaan tu mungkin dek karano pitih kurang atau sabab lain. Sapalimo dari permintaan nan talok nyo. Tapi dek si anak daro kareh nak balaki, dibueklah sandiwara.”

“Sandiwara baa?”

“Di dalam rapek antaro ninik mamak kaduo balah pihak, jumlah permintaan 250 juta tu nyo iyoan dek mamak anak daro. Kutiko rapek lah usai, mamak pihak anak daro manyuruak-nyuruak manamui mamak marapulai. Barago. Dalam acara resmi, japutan tatap disabuik 250 juta tapi dalam kenyataannyo indak baitu. Baa agak hati waang tu. Basandiwara ndak tu?”

“Tapi antaro mamak kaduo balah pihak kan lah maraso bajaso bana managak an jo manjalanan adat Minangkabau. Padohal itu kan soal jua bali, japuik manjapuik, untuk tampak dek urang bahaso minantu awak iyo maha haragonyo. Sakaligus mampacaliak an ka urang rami bahaso mamak pihak anak daro memang mampu mambaie uang japutan sabanyak tu.”

“Jadi manuruik waang itu sandiwara?”

“Kalau indak sandiwara apo namonyo? Drama? Tonil? Pembohongan publik?”

“Jadi molah. Kasimpulannyo, urang Minang ko dalam urusan kawin-mangawinan, kubua mangubuan dalam suatu kamatian, panuah dek babagai sandiwara? Baitu?”

“Iyo. Untuak manaiak an gengsi. Itu sababnya drama Minang tu indak namuah kambang di Minangkabau ko. Sabab nan taruih jalan adolah sandiwara dalam adat Minang. Labiah bagengsi dan sukses bilo urang Minang tu berhasil basandiwara dalam adat pado dalam sandiwara Minang itu sendiri.”

“Tapi sandiwara tu kini dima dima ado. Indak di dalam adat Minangkabau sajo. Iyo kan?”

“Kini kan banyak pejabat tenggi nan dimintak untuk malakek an saluak pengulu. Bara lo pangulu nan kadilakek an saluaknyo tu mambie si pejabat, supayo namuah pejabat tu datang malakek an saluak? Apo itu tamasuak sandiwara juo?”

“Nan malakekan saluak pangulu tu adolah laki-laki nan paliang tuo nan masih iduik di dalam kaum. Indak buliah urang lain suku. Kini, rela si pangulu dipasang saluaknyo dek sorang pejabat, walau pejabat tu kamanakan di bawah lutuik dek si pangulu.”

“Kalau saluak dilakek an dek pejabat, tantu pangulu samakin tenggi gensinyo.”

“Jadi untuk batambah gengsi, paralu awak basandiwara? Baitu?”

“Alah, di zaman kini apo nan indak buliah dibuek, diusahokan mambueknyo. Itu namonyo pembaharuan. Pembaharuan dalam adat Minang.”

“Jadi tando adonyo pembaharuan dalam adat Minangkabau adolah samakin bagengsi urang kalau berhasil basandiwara dalam adat? Baitu?”

Tibo-tibo lampu iduik baliak. Tipi iruak lo baliak. Indak tadanga lai patangkaran urang baduo tu.***

 


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: