Oleh: Wisran Hadi | 30 April 2011

Jilatang  01-05-11

UNTUANG INDAK TAPILIAH

Oleh: Wisran Hadi

“Iyo lah sayang bana Tuhan ka waang Tang,” kato Jila kutiko basobok jo Atang di teras musajik Nurul Iman. Kutiko tu Atang sadang mamasang sipatu nak pai, Jila tibo malatak an tarompa nak masuak.

“Waang urang swasta, ma jaleh dek waang pakaro Tuhan di musajik pamarentah ko,” kato  Atang jo nada tenggi.

“Baa kok marabo se sakali. Padohal waang baru sudah sumbayang?  Baa tadi di dalam? Berang Tuhan ka waang?” solo si Jila.

“Sudahlah Jila. Apo kecek waang sabanta ko? Tuhan sayang ka waden? Sayang baa Tuhan tu?” tanyo Atang.

“Untuang waang indak tapiliah,” kato Jila serius.

“Mustinyo waang turut berduka cita dek karano kawan waang ko indak tapiliah. Tanyato waang waang bersuka ria. Hantu! Di mana latak partisipasi, apresiasi, simpati, empati waang ka kawan sendiri,” hariak Atang.

“Sapandai-pandai sopir bus kota, indak mungkin sakali duo bus kota tu nyo sopiri doh. Sapareman-pareman sopir angkot, alun ka talok dek mereka tu manyopir angkot sakali duo,” kato Jila.

“Mukasuik waang apo? Mangecek baibarat-ibarat, roman pengurus LKAAM nan baru dilantiak lo tampak di depan mah,” kato Atang. “Taruih tarang, roman lampu Pilliph tu ha! Terus terang, terang terus!” hariak Atang.

“Maaf den Tang. Den kritik keras waang di muko musajik ko. Danga! Alun cukuik anam bulan waang dipiliah urang jadi rektor, kini lah sato pulo mancalonan diri manjadi rektor di tampek lain. Padohal waang bajanji dimuko urang banyak, bahaso waang ka mamikua baban tu sampai sudah. Cangok roman tu indak katuju dek den. Pemimpin apo pulo waang, kalau kerakusan nan labiah kamuko dari pado amanah,” kato Jila.

“Kalau lai ado peluang apo salahnyo?” jawek Atang.

“Waang lai panah mancaliak baruak makan. Di dalam muncuangnyo nan sabalah suok jo nan di sabalah kida panuah dek makanan. Namun inyo taruih juo manggapai makanan lain nan alun masuak ka muncuangnyo. Roman tu nan katuju dek waang? Katuju dek waang dikecek an urang bahaso si Atang makan roman taratik baruak! Akok!” kato Jila.

“Jila, danga kecek den. Mangaritik buliah tapi jaan sampai waang samoan waden jo baruak. Beradablah saketek,” hariak Atang.

“Seorang pemimpin tu tapuji kalau inyo mamacik amanah. Kalau inyo lah mamiliah nan ciek, nyo karajoan sampai sudah. Baru dikakok lo karajo lain. Makan sapiriang abih, baitu niniak awak maajaan taratik makan dulu kan?” kato Jila.

“Itu sababnyo waang kecek an baruntuang waden indak tapiliah? Supayo jaan dituduah waden ko cangok. Supayo waden indak digunjiangan urang akok,” tanyo Atang.

“Iyo. Urang maharok an waang jadi pemimpin masa depan, tetapi kalau sajak kini waang manpacaliak an sipat buruak waang tu, picayolah Tang, sasudah waang manjadi rektor kini, indak ka dipiliah urang lai waang doh,” kato Jila.

“Jaan mandahului kaputusan Tuhan kawan,” kato Atang sambia mampatawuik an garamannyo manahan berang.

“Kutiko waden manyabuik-nyabuik Tuhan, waang kecek an waden indak berhak mangecek pakaro Tuhan di musajik pamarentah ko. Tapi nan waang buliah mangecek pakaro Tuhan salamak paruik se,” kato Jila sambia masuak ka dalam musajik. ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: