Oleh: Wisran Hadi | 30 April 2011

JO PISTOL AIE KA TEMBAK MAFIA PERADILAN TU?

OTA KUSIE BENDI – Haluan Minggu

 JO PISTOL AIE KA TEMBAK MAFIA PERADILAN TU?           

Oleh:

Wisran Hadi

Muncak, kusie bendi nan malang tu tapaso bajalan kaki sajak mulai dari kantua polisi nak pulang ka kadangnyo. Manjunjuang pakakeh jo mangapik banta-banta tampek duduak di bendinyo. Kudonyo bajalan di muko. Katiko basuo jo Mas Sam di pandakian, Muncak tapurangah, maelo angok dek latiah bajalan kaki.

“E, Muncak. Ma nyo bendi?” sorak Mas Sam.

“Kanai tangkok. Kini batinggaan di kantua polisi,” jawek Muncak.

“Tatangkok dek karano sorek-surek indak langkokkan?” tanyo Mas Sam mairiangan Muncak dari balakang.

“Iyo. Rebewes den lupo mambaonyo,” kato Muncak.

“Iyo baitu nasib urang ngenek ko Muncak. Salah saketek langsung divonis. Didendo, dihukum. Tapicubakalau urang bapitih banyak roman si Gayus tu ha. Negara rugi trilyunan rupiah, tapi Gayus cukuik dihukum dihukum 7 tahun se, didando lo snek. Tapi bukan indak mungkin bisa lo bebas isuak dek hakim nan lain. Iyo bedo mancari keadilan di ateh dunia ko ndak Muncak?” solo Mas Sam.

“Di dunia ko nan ado keadilan tu cuma Tuhan nyo Mas Sam. Bialah urang maliang, hakim, koruptor, jaksa, polisi, pelacur, urang tak baagamo, samo-samo nyo agiah dek Tuhan dapek cahayo matoari. Samo-samo diagiah dapek udaro. Tapi nan keadilan manusia, memang iyo tagantuang urangnyo. Wadenkancuma kusie bendi, dek karano lupo mambao rebewes, bendi den ditahan di kantua polisi.  Itu keadilan nanadendapek.”

“Tagantuang pitih lo gai, Muncak.”

“Pitih?  Baa kok tagantuang pitih?”

“Kini nan bakuaso bukan keadilan, bukan undang-undang, bukan hakim, bukan jaksa, bukan hati nurani! Tapi duit! Uang! Pitih! Kepeang!Adopitih sadonyo bisa didapek. Jo pitih awak bisa dapek keadilan. Jo pitih awak bisa dapek pangkek apo nan katuju.”

“Iyo tumah Mas Sam. Jo pitih tu, urang bisa babini mudo gadih matah rancak! Iyo ndak?”

“Itulah Muncak. Sajak sari den kecek an. Labiah rancak Muncak jadi maliang tapi malingnya milyaran. Kalau tatangkok, Muncak bisa bagi-bagi kepeang itu untuk jaksa, hakim, antah sia lo lai, sahinggo Muncak bebas dari tuduhan. Nan bedo kini,kanMuncak tatap batahan jadi jadi kusie bendi. Lupo bao SIM, langsuang ditangkok, didando. Jadilah urang maliang gadang, jaan jadi kusie bendi nan jujur lai,” kato Mas Sam bakutubah.

“Baa mangko baitu bana Mas Sam mangecek. Saroman urang berang tampak diden mah?” tanyo Muncak.

Sambil manapuak-napuak dado, Mas Sam mahariak mahantam tanah. “Raso keadilan den ko nan tasingguang Muncak! Raso keadilan yang ado di dalam dado den ko ha!”

“Baa kok jadi tasingguang bana raso keadilan Mas Sam tu, ha?” tanyo Muncak.

“Pasti ado permainan dari putusan-putusan pengadilan nan tidak wajar itu. Iko pasti kerja mafia keadilan!”

“Kecek Mas Sam jo berang-berang sapanjang jalan ko lai kabarubah dunia ko? Indakkan?Apolai Mas Sam cuma urang pajalan kaki. Akar rumput istilahnyo kini tumah.”

“Kalau awak iyuo ka maubah hukum di nagari ini, mafia pengadilan roman tu harus ditembak dulu!” sorak mas Sam malapehan sakik hati.

“He,he,he…jo apo ka Mas Sam tembak? Jo pistol aie? Lai baraie juo pistol Mas Sam tu lai? ” jawab Muncak terkekeh-kekeh.

*

 


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: