Oleh: Wisran Hadi | 30 April 2011

DI BATU MANANGIH GUBERNUR MANANGIH

Jilatang 27-02-11

 DI BATU MANANGIH GUBERNUR MANANGIH

oleh: Wisran Hadi

Pulang berdarmawisata dari Batu Manangih, objek wisata nan paliang rami dikunjungi dek urang awak nan suko jo aie mato, nan suko minun air mata penganten, nan suko baminyak jo air mata duyung, tajadi patangkaran antaro si Atang jo si Jila. Mulo-mulonyo curito bagarah-garah, e, kudian samo-samo naiak tensi, stres dan ampia pulo kolap.  “Iyo kiramaik batu manangih tu ndak Jila,” komentar Atang sasudah tacangang-cangang mancaliak batu tagak nan mangaluaan aie dari salo-salo rataknyo,” kato Atang. Itu pangka bala patangkaran tu.

“Kiramaik baa?” tanyo Jila acuah indak acuah.

“Manangih pak Gubernur tampak di den sasudah mancaliak batu manangih ko,” jawek Atang saroman urang babisiak.

Jila tacangang, sudah tu nyo galak surang. “Lai indak tabaliak tu Tang,” solo Jila.

“Tabaliak baa?” tanyo Atang indak mangarati mukasuik Jila.

“Batu tu nan manangih mancaliak gubernur atau memang gubernur nan tapaso manangih di muko batu tu?” jawek Jila.

Itulah nan jadi pemicu (pemicu ko bahaso awak nyo apo Tang?) patangkaran duo parewa nan gilo-gilo ranang tu. Jila tatap batahan jo pandapeknyo, bahaso batu itulah nan manangih mancaliak gubernur, bukan gubernur nan manangih di muko batu manangih tu.

“Batu tu sangajo manangih di muko gebernur, bukan untuak mampatangih gubernur, tapi ibo hati batu tu, baa mangko pitih gampo basunat se taruih dek anak buah gubernur tu. Padohal batu tu lah sato pulo dapek musibah, tabanam satangah senti dek dioyak gampo, sampai kini alun juo dapek bantuan lai,” kato Jila mempertahankan pandapeknyo. “Kok kariang aie den isuak, jo apo waden ka manangih lai pak Gub. Tantu indak ka datang turis kamari mancaliak den lai doh. Tantu lah bakurang pulo pitih masuak urang kampuang di siko. Batambah bansaik juo urang kampuang ko mah, pak Gub. Baitu bana isak tangih batu manangih tu,” tukuak Jila manirukan baa kecek batu manangih tu.

Nan si Atang tatap pulo batahan jo pandapeknyo, bahaso gubernur bana nan manangih mancaliak batu manangih tu. “Gubernur tu manangih untuak maagiah sugesti ka batu manangih supayo batu manangih tu tatap taruih manangih!” hariak si Atang mempertahankan pandapeknyo. “Lai tadanga dek waang isak pak gubernur di muko batu manangih tu? Indak kan? Danga kecek den. Ondeh batu manangih. Waden iyo tapaso manangih di muko batu kiramaik ko. Lah lamo waden indak manangih. Biasonyo waden manangih taruih se mamikiekan nasib partai den. Kini lah sajak jadi gubernur ko indak ado nan ka den tangihan lai.  Kini waden taragak manangih. Itu soalnyo,” kato Atang maluluang-luluang maniruan baa gaya gubernur manangih.

“Antah iyo baitu antah indak, di ma basobok dek waang pak gubernur tu?” solo Jila saroman urang bacan.

“O, jadi mantang-mantang waden ko tukang parkir, indak tadanga di den tangih gubernur lai?” hariak Atang. “Jaankan suaro tangih pak gubernur, suaro tangih rakyatnyo tiok malam tadanga diden!” hariak Atang.

“Waang sagalo bakabihan mah. Indak ado rakyat pak gubernur nan manangih kini lai doh,” solo Jila.

“Baa mangko indak? Dek karano kudo jo jawi lah nan alah babagi-bagi, surang petani sikue jawi, kan?” kato Atang.

“Mangko rakyat pak gubernur tu indak manangih, dek karano indak ado aie mato nan kadikaluakan lai. Roman Batu Manangih tu ha! Sabanta lai kariang tumah!” kato Jila. ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: