Oleh: Wisran Hadi | 30 April 2011

GILIRAN MUNCAK DAPEK GALA DOTOR

Ota Kusie Bendi – Haluan Minggu

 GILIRAN MUNCAK DAPEK GALA DOTOR

Oleh:

Wisran Hadi

Taangguak-angguak balam Muncak mandanga uraian Mas Sam, bahaso inyo sebagai satu-satunyo kusie bendi nan ka diagiah pulo gala dotor.

“O, jadi kini giliran waden pulo lai ka diagiah gala mah yo?” tanyo Muncak sasudah Mas Sam manarangkan ka ilie ka mudiak tantang baa paralunyo Muncak diagiah gala penghormatan roman tu. “Sebagai representasi hasil dari industri otak yang dicanangkan tempo hari,” kata Mas Sam meyakinkan. Sudah tu Muncak galak takekeh-kekeh. “Dek karano kudo den labiah sehat daripado kudo-kudo bendi nan lain, lalu diagiah waden gala dotor? Dotor hewan mukasuik Mas Sam?Nanalah jadi dotor hewan tu namonyo Asrul Sani atau Taufiq Ismail,” kato Muncak.

Sasudah haniang anam minik, Muncak manaruihan keceknyo. “E, Mas Sam urang nan ka diagiah gala dotor tu musti urang nan sehat. Badannyo sehat, jiwanyo sehat. Gapuak stek. Banyak karajo daripado maota. Urang roman waden ko kalau diagiah gala dotor, dikecek an urang beko waden dotor sakik atau dotor rangkik. Badan kuruih, sunguik taba, pancaliak an tarang-tarang kain, tali jantuang acok basaua jo tali les kudo den ko ha.”

“Apapun komentar Muncak, yang jelas Muncak akan diberi penghormatan tertinggi,” kata Mas Sam.

“Pidato lo waden stekkan?” tanyo Muncak.

“Itu yang penting. Pidatonya. Soal apa yang sudah dikerjakan semua orang tahu, bahwa Muncak itu adalah kusir. Kini pidatonya itu yang ditunggu orang,” kata Mas Sam.

“Susahmah mas Sam. Antaro ota jo pidato lah roman kantuik jo ale liue se dek den sajak sari, lai indak baa tu?” tanyo Muncak.

“Pidato Muncak nanti akan berjudul Pengendalian Arus Penumpang Pada Transportrasi Tanpa Mesin Di Tengah Spekulasi Para Tengkulak Terhadap Kenaikan Harga Minyak Akibat Demo Timur Tengah Yang Tidak Berkeruncingan Dalam Rangka Memperkuat Ketahanan Nasional di Pulau Jawa  dan Kesatuan Kebangsaan Dalam Era Otonomi Daerah Yang Berbasis Pada Kearifan Lokal Dengan Latar Belakang Adat dan Budaya Alam Minangkabau Yang Bertumpu pada Adat Basandi Syara’, Syara Basandi Kitabullah Jilid Dua  Yang Telah Diperbaharui Dalam Kongres Kebudayaan Yang Berubah Bentuk Menjadi Seminar Minangkabau…”

            Alun abih kecek Mas Sam lai manyampaian apo nan kadipidatokan Muncak tu, Muncak langsuang se manyolo. “Nan Mas Sam baco sabanta ko judul pidato nan kaden sampaian atau alah jo isi-isinyo sakali?” tanyo Muncak.

“Muncak, maafkan saya. Pemberian gelar itu adalah pemberian gelar kehormatan tertinggi akademik, Doctor Honorus Causa. Muncak jangan main-main. Hanya itulah balas jasa yang dapat saya berikan kepada Muncak yang selama ini Muncak telah menggratiskan sewa bendi kepada saya. Hutang emas boleh diganti, hutang budi di bawa mati.Kanbegitu pepatah Minang kitakan?” umbuak Mas Sam.

“Aratino bana, gala tu banamo honorus kausa. Disingkek jadi dotor haka. Kapanjangannyo manjadi Dotor Hasil Kolaborasi. Baitu?” tanyo Muncak.

“Sudahlah Muncak. Talampua banyak mangecek, tabukak sagalo rahasio awak baduo beko,” bisiak Mas Sam jo logat Minang nan lucu tadanganyo.***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: