Oleh: Wisran Hadi | 30 April 2011

KA BABAO KAMA MINANGKABAU KO

Jilatang 13 Maret 2011

 KA BABAO KAMA MINANGKABAU KO

Oleh: Wisran Hadi.

Atang mangapik tas jo map tigo warna; kuniang, merah jo itam. Tagak di tapi jalan Tunggang mananti bus kota dari kampus Limau Manih. Sasudah dapek tampek duduak, kabatulan di sabalahnyo lah duduak pulo si Jila. Sakileh tampak dek Jila map tu bamerek tulisan “Minangkabau”.

“Ka babao kama Minangkabau jo bus kota goyoh sarupo ko kawan?” tanyo Jila.

“Minangkabau?” tanyo Atang takajuik. Kudian inyo sadar bahaso mapnyo bamerek kato Minangkabau tu. Atang galak sengeang. “O, minangkabau awak ko?” tambah Atang sambia galak bagumam ma ampok-ampok mapnyo tu. “Kini Jila, sadonyo urang sadang menenteang Minangkabau kama-kama. Ado nan manginginkan Minangkabau itu dijadi propinsi. Ado yang menginginkan Minangkabau ini dijadian daerah istimewa saroman  Jogja atau Aceh Nangru Darusalam.”

“Ado pulo nan manjadian Minangkabau tu namo klub bola kaki, kan? Acok kalah pado manang. Ado pulo nan manjadian Minangkabau ko namo lapangan kapatabang. Jaan kan ka dapek labo, malah acok pulo tadanga rugi. Ado nagari banamo Minangkabau jalan kasinan sampiknyo bukan main, saroman oto nan ka pai ka sinan tu sagadang kotak api-api. Dulu ado pulo intelektual Minangkabau, sampai kini haniang. Tapi baa mangko indak indak ado urang nan namuah manyabuik PSK Minangkabau atau TKI Minangkabau,” kato Jila roman urang manyumpah-nyumpah.

“Hari pagi jo lai, Jila lah lah main patang se,” solo Atang.

“Dek sari Minangkabau ko dibao jo padati, parang paderi urang. Sudah tu jo oto tangsi, jadi gundik balando niniak kito. Kini dibao jo bendi. Nak pai kama Minangkabau?” hariak Jila mancaliak paja-paja bagonceang bapaluak-paluak malintehi bus kota tu. “Sudah tu ado nan mangecek an Minangkabau ko dulunyo bukan kerajaan, cuma nagari-nagari se basatu samo-samo inyo. Nan kalamak dek kakuran se Minangkabau komah,” garutu Jila.

“Kalau Minangkabau koi tadiri dari persatuan nagari-nagari, lalu kato Minangkabau tu dari ma datangnyo? Apo mungkin urang di nagari-nagari itu dulunya setuju se manamokan nagarinyo Minangkabau? Apalai urang Minang, Jila! Ma pulo namuah inyo manamokan nagarinyo baitu sajo manjadi Minangkabau?” kat Atang.

“Agak hati den, Balando si penjajah tulah nan mamaso datuk-datuk Minangkabau ko supayo manamoan nagarinyo Minangkabau, yo ndak?” tanyo Jila.

“E,e,e namo Minangkabau tu alah ado sajak dunia takambang. Begitu kan Jila?” solo Atang.

“Kalau namo tu lah ado sajak dunia takambang, baa mangko si Atang sato-sato pulo manjojoan Minangkabau kaniak ka mari jo bendi den ko, saroman manjojoan talua asin atau sala lauak?” tanyo Jila.

“Soal Minangkabau kini angek pulo baliak. Dek sari ka diadoan kongres tapi ditulak. Daripado indak, dijadikan sajo seminar.  Sesudah seminar, haniang! Kini ado pula ulasan-ulasan di facebook tentang Perjalanan Islam Dalam Penyempurnaan Adat Minangkabau,” kato Atang.

“Tapi parewa-parewa Minangko alun juo baranti main koa lai, baa tu?” tanyo Jila.

“E, Jila. Jila. Soal Minangkabau jaan dihubuang-hubungan jo main main koa, baampok, judi, prostitusi, korupsi, kolusi, jaan kawan! Minangkabau tu iyo Minangkabau,” kato Atang tegas.

“Artinyo bana, jaan dikaik-kaik an pulo adat Minangkabau tu jo syara, jo kitabullah, baitu?” tanyo Jila. “Minangkabau roman tu nan ka waang jojoan kini lai Tang?” garutu Jila. ***


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: