Oleh: Wisran Hadi | 30 April 2011

KREATIF TU ADOLAH URANG NAN BISA MANGECEK AN SESUATU NAN INDAK TAMPAK

Jilatang 27-02-11

 KREATIF TU ADOLAH URANG NAN BISA MANGECEK AN

SESUATU NAN INDAK TAMPAK

Oleh:

Wisran Hadi

“Tando urang kreatif itu adolah urang nan bisa maubah-ubah apo nan dicaliaknyo. Kalau inyo mancaliak matohari ka tabanam, urang kreatif bisa mambayangkan bahaso matohari tu ka tabik. Kalau nampak dek urang kreatif ado urang nan mamakai baju ijau, urang kreatif bisa mambayangkan bahaso urang tu babaju merah. Kalau ado urang-urang maosoang jenazah dari musajik ka pai ka kuburan, urang kreatif manampak jenazah tu bantuak samba palai. Jadi, urang kreatif tu Jila, adolah urang nan bisa mancaliak sesuatu nan indak nampak dek urang,” kutubah si Atang maaja si Jila pakaro kreatifitas.

“Hantu lai nampak dek urang kreatif tu?” tanyo Jila.

“Hantu tukanmakhluk gaib,” jawek Atang.

“Mustinyo urang kreatif tu juo bisa mancaliak makhluk gaib. Bisa inyo mambayangkan bantuak apo bana hantu tu. Lai bantuak urang? Bara matonyo? Hantu-hantu batinonyo lai pulo babaju tampak pusek, basirawa tampak ikue saroman gadih-gadih kini? Lai mancacah kaki hantu tu bajalan di tanah atau indak,” kato si Jila.

“Kini urang-urang kreatif tu baru sampai pado batas maubah pandangan sajo baru. Rumah urang nan lah runtuah dioyak gampo tahun kapatangko, bisa tampak dek urang kreatif bahaso rumah tu alun patuik lai diagiah bantuan lai,” jawek si Atang.

“Tantu dalam soal ujian akhir anak sikola, urang kreatif tu banyak pulo ndak?” tanyo Jila.

“Iyo, iyo. Baa caro manjadikan anak sikola di nagariko banyak nan lulus ujian, itu adolah karajo guru-guru kreatif. Murik nan pandai, buliah maagihan jawek ujian ka kawan-kawan sabalah manyubalah, guru guru nan elok laku, buliah mambuek jawek soal ujian dan dibagikan ka murik-murik. Kreatif ndak tu?” tanyo si Atang.

“Kreatif. Pakaro kaputusan pengadilan lai bisa dikreatifan pulo ndak, Tang?” solo si Jila.

“Adopulo nan paliang hebat lai kawan,” kato si Atang.

“Apotu? Kapalo kantua manikahi bini anak buah?” tanyo si Jila.

“Itu alun hebat lai tudoh. Dek sari, ado urang mangecek an bahaso Al-Quran tu adolah kitab nan paling porno di ateh dunia ko. Usut punyo usut, tanyato urang buto, indak pandai mambaco apo-apo doh. Baa agak hati waang jila? Kreatifkanurang tu?Nanindak nampak, bisa nyo ketahui,” kato si Atang.

“Tang. Waden pakaro kitab-kitab tu iyo indak jaleh doh.Nansatahu waden Quran tu kitab suci, tuntunan ummat sampai hari kiamat. Kalau urang buto saroman tu dikecek an kreatif, tantu kini batanyo waden sakali lai, kreatif tu apo sabananyo?” kato si Jila batanyo.

“Kreatif tu adolah mangecek an sesuatu nan indak tampak, baitu kecek seniman kawan den nan maronggok-ronggok sajak pagi sampai patang di palanta lapau Taman Budaya tu,” jawek si Atang.

“Anak sikola ujian, mancenek, lulus, tu dikecekan prestasi belajar naiak. Itu dinamokan kreatif. Quran nan indak tampak dimatonyo lai, dikecek an kitab nan paliang porno, itu dikecek an kreatif. Kayu balak barubah-rubah jumlahnyo dikecek an kreatif. Urang nan alah musti masuak panjaro, tapi kini masiah bakaliaran juo di lua lai, dikecek an kreatif,” kaluah si Jila sambia manyirangik mamacik kapalo.

“Dek a waang Jila.Gayawaang tu indakgayaurang kreatif bagai tu doh kanti,” cimeeh si Atang.

“Raso ka pansan den dek pelajaran kreatif waang tu mah Tang,” jawek si Jila.**


Responses

  1. Tulisan Boss ko yo mantab2 mah, atang jo si Jila juo baru lai, kok mode tu bialah dak kreatif gai wak Boss, lah samo lo jo si Jila, paniang wak mambaco kreatif2an ko ha…..

  2. kereatif😀 hanya tan tau artinya apa? karna saya tak orang minang😀


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: