Oleh: Wisran Hadi | 30 April 2011

WAKIE RAKYAT TAKUIK KA RAKYAT, ITU NAN DEMOKRASI.

Jilatang 13-02-11

 WAKIE RAKYAT TAKUIK KA RAKYAT, ITU NAN DEMOKRASI.

Oleh: Wisran Hadi

Sajak Atang lah manjadi wakie rakyat dan karajonyo duduak di Dewan Perwakilan Rakyat untuak daerah tingkek duo, agak mahanggau inyo mangecek pakaro rakyat kini. Labiah banyak inyo mangecek pakaro partai nan maangkeknyo, daripado rakyat nan diwakilinyo. Namun samantangpun baitu, nan lagak si Atang tatap bangang, saroman dulu juo. Kalau dulu inyo bangang ka dirinyo, kini inyo bangang ka urang rami. Kateh iduangnyo bilo basobok atau basalisiah lalu jo urang.

Kapatangko Atang tapakiak. Laptop nan baru diagiah dek kantua, nan taruih dikundang-kundang ilie mudiak, ilang di ateh oto. Saminggu sabalun tu, hape nan batinggan diateh oto lah mangirap pulo. Hape Atang nan biasonyo limo, kini tingga se duo lai. Duo minggu sabalun tu, dompet nan ilang. Sadonyo tu ilang dek tatingga di ateh oto.

“Lah marajalela bana urang maliang di kantua den kini Jila,” kato Atang mamulai curhat jo kawannyo tu. “Laptop, hape, dompet, jas nan baru baambiak dari dobi, ilang diateh oto. Nyo pacah kaco oto baru den tu. Nyo pacah! Gilo. Nyo sangko sia waden,” garutu Atang.

“Baa kok sampai ilang? Sia pulo nan barani mamaliang pakakeh milik anggota dewan nan terhormat ko ha!” hariak Jila icak-icak berang lo.

“Dek sari lai dijago dek satpol pepe, aman. Sajak mereka indak sato jadi keamanan kantua dewan tu lai, lah banyak se nan ilang. Rakyat apo nan ado di nagari! Pamaliang sadonyo!” hariak Atang.

“Elok-elok saketek mangecek kawan. Waden rakyat pulo komah. Waang nan mangecek ka urang banyak, bahaso anggota depeer adolah wakia rakyat! Kok wakie rakyat dimaliang?” kato Jila manyirengeh.

“Kan dek itulah Jila, mako waden turuik bana waang ka mari. Nak mancari solusi, baa caro supayo rakyat nan den wakili tu indak mamaliang waden,” kato Atang.

“Kok ka mancari solusi tu iyo indak dapek diden doh kawan. Tapi nan musti waang kana adolah, kalau waang iyo lai sabana mamperjuangkan nasib rakyat, tantu rakyat ka mambela waang. Tapi kalau hak rakyat waang maliang tantu rakyat mambaleh mamaliang milik waang,” jawek Jila.

“Hak rakyat apo nan waden maliang?” tanyo Atang.

“Soal apo nan waang maliang, tantu waang nan tahu apo nan waang maliang, kawan,” jawek Jila. “Nan jaleh rakyat lah banyak kahilangan, dek karano tu inyo mambaleh, nyo maliang pulo apo nan waang punyo. Sabanta lai, kok taruih sajo waang maliang haknyo, rumah rancak waang nan baru sudah tu, ka dimaliang rakyat pulo tumah. Bini mudo nan waang suruak an di Pulau Talena tu bisa-bisa dimaliang rakyat pulo. Jaan main-main jo rakyat ko Tang. Matonyo banyak sadonyo tampak dinyo, pandangarannyo sabalik sadonyo tadanga dinyo, indak bisa bagai waang basisuruak-sisuruak doh,” kato Jila manesaheti kawannyo nan bangang tu.

“Kalau baitu, bia den tambah penjagaan kantua den jo satpol pepe agak duoratuih urang lai. Ma buliah rakyat lanteh angan ka anggota dewan! Sia inyo! Sia rakyat tu! Sia ayah e! Si godok? Bingkaruang?” sorak Atang tarabo.

“Nan satpol pepe tu rakyat juo mah kawan. Samakin dikawal kantua waang tu atau indak dikawal samo sajo nyo. Nan maliang tatap jalan. Tapi kan waang lah tahu, bahaso banyak udang-udang anti korupsi nan waang buek. Samakin banyak undang-undang anti korupsi, perda anti korupsi, samakin lateh angan pulo waang mambae pitih rakyat,” jawek Jila.

“Jadi, manuruik waang induak maliang adolah anggota-anggota dewan tu?” tanyo Atang.

“Itu indak jaleh diden doh. Kan waang sajo nan maraso roman tu. Kalau memang baitu perasaan waang, iyo baitu kanyataannyo tumah. “Iyo bedo ndak Tang. Takuik wakie rakyat maadok i rakyat nan diwakilinyo sendiri ndak? Itu nan inti pangajian demokrasi tu Tang”.***


Responses

  1. Mingkaruang ayah si Atang ko mah……
    Maliang kanai maliang judul e ko mah Boss…….. 😀


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: